იტალიის დედაქალაქ რომში მიმდინარე ევროპის ჩემპიონატზე ბერძნულ-რომაულ სტილით ჭიდაობაში საქართველოს დელეგაციამ მეორე მედალი მოიპოვა.

130 კგ წონით კატეგორიაში ლევან არაბული, რომელმაც გუშინ ქულადაუკარგავად იასპარეზა, ფინალში რუმინელ ალინ ალექსუს ციურარიუს დაუპირისპირდა და პირველი პერიოდი 1:0 მოუგო კიდეც, თუმცა სამწუხაროდ მეორე პერიოდში მეტოქეს ვერ გაუმკლავდა და საბოლოოდ 1:6 დამარცხდა. შედეგად, ვერცხლის მედალს დასჯერდა.

აქვე გეტყვით, რომ ნახევარფინალში არაბულმა ფინელი არვი მარტინ სავოლაინენი ძალიან ადვილად აშკარა უპირატესობით დაამარცხა. იქამდე კი, ქართველმა მოჭიდავემ რომში თავდაპირველად იტალიელი ელ მაჰდი როკარო 9:0 გაანადგურა, ხოლო შემდეგ ამავე ანგარიშით გერმანელ იელო კრამერს აჯობა.

შეგახსენებთ, საქართველოს დელეგაციას ევროპის ჩემპიონატზე პირველი მედალი ნუგზარ წურწუმიამ (55 კგ) მოუტანა, რომელიც ბრინჯაოს მედალს დაეუფლა.

ხვალ კი, ბრინჯაოს მედლისთვის ამირან შავაძე (60 კგ) გავა ხალიჩაზე, ხოლო მეორე ოქროს მედლის მოპოვების შანსი 72 კგ წონით კატეგორიაში იური ლომაძეს ექნება.