81 კილოგრამ წონით კატეგორიაში მოჭიდავე უშანგი მარგიანმა გრან პრიზე დილის პროგრამა წაუგებლად გაიარა და ჩემპიონის ტიტულს ერთადერთი გამარჯვება აშორებს. სომეხი დავით სარგსიანის, ჩერნოგორიელი სრჟან მრვალიევიჩისა და მონღოლი დაგვასურენ ნიამსურენის ძლევის შემდეგ, ქართველმა ძიუდოისტმა რუსეთის ნაკრების წევრი სირაჟუდინ მაგომედოვი 2 წუთსა და 21 წამში დასცა ბეჭებზე. ფინალში კი რუსეთის გუნდის კიდევ ერთ წარმომადგენელს – ალან ხუბეცოვს დაუპირისპირდება, რომელმაც გადამწყვეტი ბრძოლის საგზური გიორგი პაპუნაშვილის ძლევით მოიპოვა.
პაპუნაშვილი მესამე ადგილისთვის იჭიდავებს, მონღოლ დაგვასურენ ნიამსურენთან.
73 კილოგრამში ნახევარფინალში ორმა ქართველმა იჭიდავა, მაგრამ ორივე სუფთად დამარცხდა. ზვიად კაპანაძე ფინალს მიღმა ყაზახმა დასტან იკიბაიევმა დატოვა, ხოლო შავდათუაშვილი – აზერბაიჯანელმა რუსტამ ორუჟოვმა.
ბრინჯაოს მედლისთვის ბრძოლაში ზვიად კაპანაძე ნუგზარ ტატალაშვილს დაუპირისპირდება, რომელმაც რეპეშაჟის ნახევარფინალში უკრაინელ არტემ ხომულას სძლია. შავდათუაშვილის მეტოქე კი კიდევ ერთი აზერბაიჯანელი, ჰუსეინ რაჰიმლი იქნება.
ფინალური ბლოკის შეხვედრები თბილისის დროით 17 საათზე დაიწყება.
