30 აგვისტოს, ქ. ბათუმის სპორტულ-ახალგაზრდულ ცენტრში (ლ.ასათიანის №27, ყოფილი ყინულის მოედანი) მინი ფეხბურთში საქართველოს ჩემპიონატის პლეიოფის პირველი რაუნდის შეხვედრები გაიმართება.

აღნიშნული გათამაშება, სპორტული ფესტივალის „საქართველო 2014“ ფარგლებში მიმდინარეობს. საწყის ეტაპზე მასში მონაწილეობას 16 გუნდი იღებდა, რომლებიც დასავლეთ და აღმოსავლეთ ლიგების პრინციპით იყვნენ გადანაწილებული. წრიული ეტაპის შემდეგ, ორივე ლიგაში ოთხ-ოთხი საუკეთესო გამოვლინდა და ისინი ერთმანეთთან ურთიერთობას ორ რაუნდიან დაპირისპირებაში გაარკვევენ. აღსანიშნავია, რომ რვა საუკეთესოს შორის, ორი ბათუმური გუნდი მოხვდა. 30 აგვისტოს სათამაშო განრიგი ასეთია:

18:00 ბათუმი (ბათუმი) - პსპ (თბილისი)

19:00 ლაზიკა (ზუგდიდი) - მფკ ბორჯომი

20:00 მფკ სამტრედია - მფკ რუსთავი

21:00 ბათუმის წყალი (ბათუმი) – TTC (თბილისი)

განმეორებითი შეხვედრებს 6 სექტემბერს თბილისი უმასპინძლებს, სადაც გაირკვევა იმ ოთხი გუნდის ვინაობა, რომლებიც საქართველოს ჩემპიონის ტიტულის მოსაპოვებლად „ოთხთა ფინალში“ ითამაშებენ, რომელიც 26-28 სექტემბერს, ქ. ბათუმში ჩატარდება. საქართველოს ჩემპიონს სპეციალური თასი გადაეცემა. გარდა ამისა გათვალისწინებულია, სპეციალური საპრიზო ფონდი: გამარჯვებული 4000 ლარით დაჯილდოვდება, 2000 ლარი გადაეცემა მეორე ადგილოსანს, ხოლო მესამე ადგილზე გასულ გუნდს 1000 ლარი ერგება.

რაც შეეხება თავად ფესტივალს, რომელიც სპორტისა და ახალგაზრდობის საქმეთა სამინისტროს ინიციატივითა და მხარდაჭერით და ეროვნული ფედერაცია „სპორტი ყველასათვის“ ორგანიზებით იმართება, მიზნად ისახავს საქართველოში სამოყვარულო სპორტის განვითარებას, მასობრიობის ზრდას, ქვეყანაში ჯანსაღი ცხოვრების წესის დამკვირებას და მისი პოპულარიზაციას. ივნისიდან მოყოლებული, საფესტივალო ღონისძიებებს საქართველოს ათმა რეგიონმა უმასპინძლა, სადაც გამოვლინდნენ კიდეც მაგიდის ჩოგბურთსა და სამოყვარულო ხელბურთში საუკეთესო მოყვარულები, რომლებიც ჩემპიონის თასებთან ერთად, სამახსოვრო საჩუქრებითაც დაჯილდოვდნენ.

ფესტივალის პრესსამსახური