ბირმინგემში, ზაფხულის ოლიმპიურ სახეობათა საერთაშორისო ფედერაციების ასოციაციის (ASOIF) 48-ე გენერალურ ასამბლეაზე, თავისი რიგებიდან კრივის საერთაშორისო ასოციაციის (IBA) გარიცხვას უყარეს კენჭი.

ASOIF-ის რიგებიდან IBA-ს მოკვეთას მხარი დაუჭირა 28 დელეგატმა, ერთმა კი თავი შეიკავა.

ცოტა ხნით ადრე სპორტის საარბიტრაჟო სასამართლომ (CAS) არ დააკმაყოფილა კრივის საერთაშორისო ასოციაციის აპელაცია და ძალაში დატოვა საერთაშორისო ოლიმპიური კომიტეტის (IOC) სესიის გადაწყვეტილება IBA-ს აღიარების გაუქმების შესახებ.

CAS-ის მაშინდელ განცხადებაში ხაზგასმული იყო, რომ IBA საერთაშორისო ოლიმპიური კომიტეტის მიერ აღიარებისთვის დადგენილ პირობებს არ შეესაბამება. კერძოდ, IBA-მ არ გაზარდა ფინანსური გამჭვირვალობა, არ უზრუნველყო მონიტორინგი და სამართლიან მსაჯობაზე ზედამხედველობა, სრულად და ეფექტურიად არ შეასრულა IOC-ის მიერ შეთავაზებული სხვა ღონისძიებები.

საერთაშორისო ოლიმპიურმა კომიტეტმა IBA-ს (მაშინ - AIBA) უფლებამოსილება 2019 წელს შეუჩერა ორგანიზაციის მმართველობასთან, ფინანსებთან, მსაჯობასთან და დოპინგთან დაკავშირებული სადავო და საეჭვო შემთხვევების გამო. იმავდროულად, კრივის საერთაშორისო ასოციაციას ტოკიოს ოლიმპიური თამაშებზე მოკრივეთა ტურნირის ჩატარების უფლება ჩამოერთვა.

ტოკიოს ოლიმპიურ რინგზე მოკრივეთა ასპარეზობებს IOC-ის სპეციალური კომისია ხელმძღვანელობდა. ასე იქნება პარიზის 2024 წლის ოლიმპიურ თამაშებზეც.

GEONOC.ORG.GE