პსჟ-ის პრეზიდენტმა ნასერ ალ-ხელაიფიმ ისაუბრა ამ სეზონში პორტუგალიელი ფეხბურთელების თამაშზე და ამ ქვეყნიდან ნიჭიერი ახალგაზრდების მოზიდვაზე, როგორც სპორტული დირექტორის ლუიშ კამპუშის პოლიტიკის ნაწილზე.
„ძალიან კმაყოფილი ვარ გონსალუ რამუშის, ვიტინიას, დანილუ პერეირას და ნუნუ მენდეშის დონით და ასევე ვენდობი ჩვენს დირექტორს ლუიშ კამპუშს. ვამაყობ, რომ ისინი ყველა ჩვენს კლუბს წარმოადგენენ. პორტუგალია შესანიშნავი ქვეყანაა ფეხბურთისთვის. იქ ყოველთვის ბევრი ნიჭიერი სპეციალისტი და მოთამაშეა, რომლებსაც ჩვენ აქტიურად ვადევნებთ თვალს“, - ციტირებს ალ-ხელაიფის სიტყვებს ტვიტერზე ჟურნალისტი ფაბრიციო რომანო.
შეგახსენებთ, რომ პსჟ საფრანგეთის ჩემპიონატში პირველ ადგილზეა. ესპანელი მწვრთნელის ლუის ენრიკეს გუნდს 26 შეხვედრაში 59 ქულა აქვს. პარიზელებმა ჩემპიონთა ლიგის მეოთხედფინალში მონაწილეობის უფლება ორ მატჩში „რეალ სოსიედადის“ დამარცხებით მოიპოვეს. პარიზული კლუბი საფრანგეთის თასის ნახევარფინალშიც გავიდა, სადაც „რენს“ შეხვდება.
