სპორტისა და ახალგაზრდობის საქმეთა მინისტრმა ტარიელ ხეჩიკაშვილმა მსოფლიოს ჩემპიონატიდან დაბრუნებულ ახალგაზრდა მოჭიდავეებს და ჭიდაობის ფედერაციის პრეზიდენტს გეგა გეგეშიძეს უმასპინძლა. საქართველოს თავისუფალი და ბერძნულ-რომაული სტილით მოჭიდავეთა ნაკრებებმა, 1-6 აგვისტოს ფინეთის ქალაქ ტამპერეში გამართულ ახალგაზრდა მოჭიდავეთა მსოფლიოს ჩემპიონატზე 3 მედალი მოიპოვეს. საქართველოს ბერძნულ-რომაული სტილით მოჭიდავეთა ახალგაზრდული ნაკრების წევრი ზვიად პატარიძე (120 კგ) მსოფლიოს 5-გზის ჩემპიონი გახდა.

ქართველმა მძიმეწონოსანმა გადამწყვეტ ბრძოლაში ყირგიზი კიმ რომანის სძლია 6:2. ფინალის გზაზე ზვიად პატარიძემ ოთხი მეტოქე ჩამოიშორა. პატარიძეს სრული საჭიდაო დრო მხოლოდ მეოთხედფინალში დასჭირდა, ირანელ ამინ მირზაზადესთან (4:1). იქამდე იაპონელი იცუკი შოჯის 47 წამში მოუგო (8:0). რუმინელ ლენარდ იშტვან ბერეის 17 წამში (8:0), ნახევარფინალში რუსეთის ნაკრების წევრ გიორგი გაჯინოვს კი 4 წუთში (9:0). საქართველოს თავისუფალი სტილით მოჭიდავეთა ახალგაზრდული ნაკრების შედეგი ორი მედალია - გივი მაჭარაშვილმა (96 კგ) ვერცხლი, ხოლო ივერიკო ჯულაყიძემ (66 კგ) ბრინჯაო მოიპოვა.

1-6 აგვისტო. ტამპერე, ფინეთი. ჭიდაობა. ახალგაზრდული მსოფლიოს ჩემპიონატი

ბერძნულ- რომაული სტილით ჭიდაობა
ზვიად პატარიძე (120 კგ) - ოქრო

თავისუფალი სტილით ჭიდაობა
გივი მაჭარაშვილი (96 კგ) - ვერცხლი
ივერიკო ჯულაყიძე (66 კგ) - ბრინჯაო

msy.gov.ge