თორნიკე ოქრიაშვილი მარსელის "ოლიმპიკის" ფეხბურთელია. აღნიშნულ ინფორმაციას ფრანგული გამოცემები ავრცელებენ. რაც შეეხება უშუალოდ "ოლიმპიკს", ჯერ ოფიციალური განცხადება კლუბს არ გაუვრცელებია, თუმცა ეს ალბათ უკვე დღეს მოხდება. ჯერჯერობით უცნობია კონტრაქტის დეტალები.
ცნობილია, რომ თორნიკემ სამედიცინო შემოწმება წარმატებით გაიარა - კლუბსა და ფეხბურთელს შორის მოლაპარაკებები დაახლოებით ერთი თვე მიმდინარეობდა და როგორც ჩანს, ყველა პირობაზე საბოლოოდ შეთანხმდნენ.
თორნიკე ოქრიაშვილს რეკომენდაცია "ფრანს ფუტბოლის" ინფორმაციით, "მარსელის" სპორტულმა დირექტორმა განტერ იაკობმა გაუწია, რომელიც ქართველ შემტევს ბელგიური "გენკიდან" იცნობს. მოგეხსენებათ, ოქრიაშვილი სწორედ ამ გუნდის საკუთრებაში იყო, თუმცა "გენკმა" მასთან თანამშრომლობის გაგრძელება არ ისურვა. გასული სეზონის მეორე ნახევარი კი 24 წლის ფეხბურთელმა იჯარით თურქულ "ეშქისერიჰსფორში" გაატარა.
