უკრაინის საფეხბურთო პრემიერლიგის 24-ე ტურში, “დნიპრომ” სტუმრად სიმფეროპოლის “ტავრია” 2:0 დაამარცხა. ამჯერად, ჯაბა კანკავა დნეპროპეტროვსკელთა სასტარტო შემადგენლობაში არ იყო და თამაშში 32-ე წუთიდან ჩაერთო. უჩა ლობჟანიძე და სანდრო კობახიძე დნეპროპეტროვსკელთა სამატჩო განაცხადში არ იყვნენ. “დნიპროს” 44 ქულა აქვს და 16 გუნდში მეორეა, “შახტარს” მხოლოდ გატანილ-გაშვებული გოლების უარესი სხვაობით ჩამორჩება.

რუსეთის პრემიერლიგის 24-ე ტურში, სამარის “კრილია სოვეტოვი”, რომელსაც საშინაო მატჩი როსტოვში ათამაშეს, მოსკოვის ცსკა-სთან 1:3 დამარცხდა. სამარელთა კაპიტანმა ალექსანდრე ამისულაშვილმა 90 წუთი იასპარეზა. “კრილია” 16-გუნდიან სატურნირო ცხრილში 24 ქულით მეთერთმეტეა.  

ლატვიის თასის 1/2-ფინალში გავიდა თამაზ პერტიას გაწვრთნილი რიგის “სკონტო” და ამაში დიდი წვლილი ირაკლი კლიმიაშვილმა შეიტანა. 47-ე წუთზე, როდესაც “სკონტო” სტუმრად თანაქალაქელ “დაუგავასთან” 0:1 აგებდა, ქართველმა ნახევარმცველმა ანგარიში გაათანაბრა. ის 84-ე წუთზე შეცვალეს. ლაშა დვალმა რიგელებში პირველიდან ბოლო წუთამდე ითამაშა. “სკონტომ” 2:1 გაიმარჯვა. 

1/2-ფინალშია “იელგავაც”, სადაც გიორგი დიაკვნიშვილი ირჯება. “იელგავამ” სტუმრად “გულბენე” 2:0 დაამარცხა და 74-ე წუთზე, მეორე გოლი სწორედ ქართველმა ლეგიონერმა გაიტანა.

აზერბაიჯანის პრემიერლიგის 29-ე ტურში, აგდამის “ყარაბაღმა”, რომლის ღირსებასაც ნიკა გელაშვილი და ჯაბა დვალი იცავენ, სტუმრად 2:0 დაამარცხა აზალ-ი, სადაც ლაშა კასრაძე გამოდის.  

გელაშვილი თადარიგში იყო, მაგრამ თამაში არ მოუწია, ხოლო დვალი 18-კაციან განაცხადშიც არ შეუყვანიათ. კასრაძემ შეუცვლელად ითამაშა. “ყარაბაღი” 10-გუნდიან ჩემპიონატს 64 ქულით ლიდერობს, ხოლო აზალ-ი 26 ქულით მერვეა..

ესტონეთის მეისტრილიგის (უმაღლესი ლიგა) მე-6 ტურში, ტალინის “ფლორა” გასვლაზე “ლევადიას” დაუზავდა – 1:1. ზაქარია ბეგლარიშვილმა სტუმრებში თავიდან ბოლომდე ითამაშა. “ფლორა” 10 ქულით 10 გუნდში მესამეა.