ევროლიგის 31-ე ტურში „ვირტუს ბოლონია“ სტუმრად ბელგრადის „ცრვენა ზვეზდასთან“ 79:94 დამარცხდა.

იტალიელებმა მხოლოდ პირველი პერიოდის მოგება მოახერხეს, თუმცა, დანარჩენ პერიოდებში სერბების უპირატესობა აშკარა იყო. ბოლონიელებს თორნიკე შენგელიამ ულიდერა, რომელმაც შესანიშნავი შეხვედრა კიდევ ერთხელ ჩაატარა.

შენგელიამ 29 წუთში 25 ქულა, 4 მოხსნა, 5 პასი და 1 დაფარება მიითვალა. საქართველოს ნაკრების კაპიტანმა 13-დან 7 ორქულიანი, 6-დან 2 სამქულიანი და 5-დან 5 საჯარიმო ჩააგდო, რის შედეგადაც მისი მარგი ქმედების კოეფიციენტი 18-ს გაუტოლდა.

თორნიკე 25 ქულით ნემანია ნედოვიჩთან ერთად მატჩის საუკეთესო მექულე იყო, მატჩის დასრულებამდე წუთიც არ იყო დარჩენილი, როცა 5 ფოლის გამო თამაშს გამოეთიშა.

„ვირტუს ბოლონია“ კრიზისშია, ევროლიგაში ზედიზედ მეოთხე მარცხი განიცადა, შედეგად 17 მოგებით და 14 წაგებით მერვე ადგილამდე დაქვეითდა, ხოლო მომდევნო ტურში 29 მარტს, „პანათინაიკოსს“ უმასპინძლებს.