სქართველოს 17-წლამდელთა ნაკრებმა დღეს, 20 მარტს, ქუთაისში რამაზ შენგელიას სახელობის სტადიონზე ევროპის ჩემპიონატის ელიტ რაუნდის პირველი მატჩი გამართა სერბ თანატოლებთან და 0:2 დამარცხდა.

ჩვენს ნაკრებს თამაშის წინ გარკვეული პრობლემები შეექმნა, ალექსანდრე ამისულაშვილი, ლუკა კვაშილავა და საბა ასანიძე გუნდს ვირუსის შედეგად გამოწვეული მაღალი სიცხის გამო გამოაკლდნენ. მათ ნაცვლად ნაკრებს - ლუკა ლაშხია, ლაშა ხუციშვილი და საბა ტარტარაშვილი დაემატნენ.

სერბებმა გვაჯობეს. ერთხელ ხარიხას მოარტყეს ბურთი (პირველ ტაიმში) და სამჯერ ძელს (მეორეში). ჩვენებურებმა კი პირველად 25-ე წუთზე შექმნეს მომენტი, შოთა დიაკონიძე ურტყამდა სახიფათოდ მაგრამ ბურთი ოდნავ გადასცდა კარს ზემოდან.

ტაიმის ბოლოს გიორგი მჟავანაძემ გოლიც გაიტანა, მაგრამ მსაჯმა თამაშგარე მდგომარეობა დააფიქსირა.

მეორე ტაიმში სტუმართა უპირატესობა კიდევ უფრო გამოიკვეთა. ბოლოსკენ ჩვენებურებს დაღლაც დაეტყოთ, თუმცა ცდა არ დაუკლიათ მდგომარეობის გამოსასწორებლად. გოლები ალეკსა ვასილოჩმა და ვასილე კოსტოვმა გაგვიტანეს. ორივე ეფექტური გამოდგა.

უკვე კომპენსირებულ დროში კი 7 წუთის ინტერვალში ვახტანგ სალიამ ორი ყვითელი ბარათი მიიღო და მინდვრიდან დაითხოვეს.

ჩვენი თანაჯგუფელები, დანიისა და თურქეთის 17-წლამდელები კი ერთმანეთს მშვიდობით დაშორდნენ - 0:0.