გიორგი მიქაუტაძის კარიერა „აიაქსში“ ძალიან ცუდად დაიწყო, ყველაზე ცუდ სცენარშიც რომ ვერ წარმოვიდგენდით.

„აიაქსმა“ „მარსელს“ უმასპინძლა და დაუზავდა - 3:3. ნიდერლანდელები ჯერ 2:0-ს იგებდნენ, მერე 3:2-ს, ბოლოს კი მაინც ვერ მოიგეს. მიქაუტაძე 90 წუთი სკამზე იჯდა... გიორგის არც ფრანგული გუნდის წინააღმდეგ მიეცა თამაშის შესაძლებლობა, იმ გუნდის, რომელსაც ერთი თვის წინ გოლი გაუტანა. მორის სტეინი აშკარად არ ენდობა ქართველ ფეხბურთელს და ნათელია, რომ მას მესამე ფორვარდად განიხილავს ბრობისა და აკპომის შემდეგ...

ამავე ტურნირზე ოთარ კიტეიშვილის „შტურმმა“ შინ ლისაბონის „სპორტინგთან“ წააგო. არადა, ავსტრიელები 58-ე წუთზე დაწინაურდნენ ვილიამ ბოვინგის გოლით, რაშიც კიტეიშვილის წვლილია. ქართველმა მოედნის ცენტრში დიდებულად ითამაშა, მერე დაახლოებით 35 მეტრიდან დაარტყა და ბურთი ძელს მოხვდა, დამატებაზე კი ბოვინგმა გაიტანა. ოთარი 68-ე წუთზე შეცვალეს, მისმა გუნდმა კი ბოლო 15 წუთში ორი გოლი გაუშვა და უქულოდ დარჩა.

კონფერენს ლიგაზე ბრატისლავის „სლოვანმა“ 2:1 დაამარცხა ფარერების „კლაკსვიკი“, რომელთანაც თავიდან აგებდა, მაგრამ მერე ორჯერ გაიტანა და იმარჯვა. ჯაბა კანკავამ შეუცვლელად ითამაშა, ხოლო გურამ კაშია ვლადიმირ ვაისმა 90 წუთი თადარიგში დატოვა. ბოლო დროს, საქართველოს ნაკრების კაპიტანი ვაისის რჩეულთა შორის იშვიათად ხვდება.