ბელგიურმა მედიამ „გენტის“ იმ ფეხბურთელების შესახებ სტატია გამოაქვეყნა, რომლებიც კლუბს განათხოვრებული ჰყავს. მათ შორისაა გიორგი ჩაკვეტაძეც. ბელგიაში არ გამორიცხავენ, რომ ჩაკვე „გენტში“ დაბრუნდეს.

„ერთხელ ისეთ გზაზე იყო, რომ შეეძლო გულშემატკივართა ფავორიტი გამხდარიყო „გენტში“, მაგრამ ფიზიკურმა პრობლემებმა ეს ზღაპარი დაარღვია. სლოვაკეთის დედაქალაქმა კი სიბნელეში სინათლე ისევ შემოიტანა. სლოვაკეთის ჩემპიონმა შესანიშნავი სეზონი ჩაატარა, განსაკუთრებით ევროპაში, სადაც კონფერენს ლიგის პლეი-ოფში ითამაშა. თუმცა, ჩაკვეტაძე აგრძელებს ბრძოლას ძველ ნაკლთან: ეფექტურობასთან. ევროთასებზე 14 მატჩში ძირითადში ითამაშა, მაგრამ გოლი ერთხელაც ვერ გაიტანა“, - წერს გამოცემა.

Voetbalprimeur-ი იმასაც წერს, რომ განათხოვრებული ფეხბურთელებიდან ჯორდან ბოტაკას და ანდერსონ ნიანგბოს დაბრუნების შანსი არ აქვთ, ხოლო ჯანი ბრუნოს და ჩაკვეტაძეს აქვთ, მაგრამ ქართველთან მიმართებაში ბელგიელებს ეჭვები ჯერ კიდევ აქვთ, მიუხედავად იმისა, რომ მისი ნიჭი ყველასთვის ნათელია.

შეგახსენებთ, რომ გიორგი ჩაკვეტაძეს „სლოვანთან“ იჯარა სეზონის ბოლოს ეწურება. ის ცოტა ხნის წინ შოტლანდიურ „აბერდინსა“ და ვენის „რაპიდს“ დაუკავშირეს.