მიუნხენის „ბაიერნის" ხელმძღვანელებმა გერმანიის ჩემპიონატის 29-ე ტურში „მაინცთან" წაგების შემდეგ (1:3), გუნდის მთავარი მწვრთნელი, თომას ტუხელი გააკრიტიკეს - წერს ტვიტერში ჟურნალისტი ფლორიან პლეტენბერგი.
მატჩის დასრულებისთანავე, დანიშვნის შემდეგ პირველად, კლუბში ტუხელის ზოგიერთი გადაწყვეტილება არ მოიწონეს. კერძოდ, დირექტორთა საბჭო უკმაყოფილო დარჩა სასტარტო შემადგენლობის შერჩევისა და როტაციის პრინციპით.
ამჟამად მწვრთნელის გათავისუფლების ვარიანტი გამორიცხულია. თუმცა, მომავალი სეზონიდან კლუბის ხელმძღვანელობა ყურადღებით დააკვირდება 49 წლის სპეციალისტისა და მისი თანაშემწეების მუშაობას.
„მაინცთან“ მარცხი „ბაიერნისთვის“ მესამე გახლდათ ტუხელის თავკაცობით ჩატარებულ შვიდ მატჩში.
იულიან ნაგელსმანის დროს, რომელიც მარტში გაათავისუფლეს, მიუნხენელები 37 შეხვედრაში ამდენივეჯერ დამარცხდნენ.
