„ნაპოლის“ მთავარმა მწვრთნელმა ლუჩანო სპალეტიმ ხვიჩა კვარაცხელიაზე კიდევ ერთხელ ისაუბრა. იტალიელი სპეციალისტის განცხადებით, მან გოლი მართლაც დიეგო მარადონას სტილში გაიტანა და ისიც აღნიშნა, რომ კვარა სწორ გზაზეა.
„იმ რაღაცებით, რაც კვარაცხელიამ გვაჩვენა, შეიძლება ითქვას, რომ მარადონასთვის დამახასიათებელი გოლი იყო. ფეხბურთის ღმერთი ფეხბურთის ღმერთი იყო, მაგრამ კვარა სწორ გზაზეა. პატარა სივრცეებში ბურთის შეხების საოცარი უნარი აქვს, რომ არასოდეს იცი სად შეიძლება წავიდეს და მიწაზე დაგცეს, თვალის პატარა ჭრილით თანაგუნდელის პოვნა და მისთვის პასის გაკეთებაც შეუძლია“, - თქვა სპალეტიმ.
შეგახსენებთ, რომ ლუჩანო სპალეტიმ „ატალანტასთან“ კვარაცხელიას მიერ გატანილი გოლი დიეგო მარადონას უნარებთან გააიგივა. მიმდინარე სეზონში ქართველმა ფეხბურთელმა ყველა ტურნირზე ჩატარებულ 28 მატჩში 13 გოლი გაიტანა, 13 საგოლე პასი გააკეთა და 3-ჯერ პენალტი მოიპოვა.
