ჯერ კიდევ გასულ წელს მთელმა საფეხბურთო სამყარომ შეიტყო, რომ ამერიკის შეერთებულ შტატებში მცხოვრებ იტალიელ მოდელ პაოლა საულინოს გულში იტალიური „ნაპოლის“ ქართველი ვარსკვლავი, ხვიჩა კვარაცხელია ყავს ჩავარდნილი და ამ განცდას და ტრფიალების ალმურს საჯაროდაც კი არ მალავს.
პაოლა ადრე იტალიის ნაკრების ბრაზილიური წარმოშობის ფეხბურთელის, ჟორჟინიოს გულისსწორი იყო და ფეხბურთელთან თანაყოფის დიდი გამოცდილება გააჩნია. აქედან გამომდინარე, ალბათ დიდი იმედი ჰქონდა, რომ კავკასიის მთების შვილი მის ტრფიალებას სიყვარულითვე უპასუხებდა, მაგრამ ხვიჩა კვარაცხელია მოდელის გულის პრანჭვებს არც კი გამოხმაურებია.
არ ვიცით და ვერც ვიმკითხავებთ, ხვიჩა კვარაცხელიას ადგილზე სხვა ფეხბურთელი როგორ მოიქცეოდა, თუმცა ის კი ნამდვილად შეიძლება ვთქვათ, რომ 22 წლის ქართველი ფეხბურთელი ბევრი კოლეგისგან განსხვავებით, მკერდ-ბარძაყზე დახამებული ვინმე არაა და იმედია ეს დამოკიდებულებები სამომავლოდაც გაჰყვება.
