ძიუდოში წლის პირველი ტურნირი, პორტუგალიის გრან პრი საქართველოსთვის უმედლოდ დაიწყო. 60 კგ წონით კატეგორიაში მედლამდე გიორგი სარდალაშვილს ერთადერთი ნაბიჯი დააკლდა, მაგრამ კვარცხლბეკზე ასვლა ვერ შეძლო.
სარდალაშვილმა ასპარეზობა მეორე წრიდან დაიწყო და ნიდერლანდელი ემილ იარინგი დაამარცხა, შემდეგ პორტუგალიელ რიკარდო პირესს აჯობა, ხოლო მეოთხედფინალში უკრაინელ არტიომ ლესიუკს მოუგო. ნახევარფინალში გიორგი ესპანელ ფრანსისკო გარიგოსთან დამარცხდა და ბრინჯაოს მედლისთვის ბრძოლა მოუწია, სადაც ფრანგ სედრიკ რევოლთან გაფრთხილებებით წააგო და მედალი ვერ მოიპოვა.
66 კგ წონით კატეგორიაში იპოლიტე აქუბარდიამ პირველივე შეხვედრა წააგო უზბეკ ბობურ ბადიევთან, ხოლო გიორგი თუთაშვილმა ეკვადორელი ლენინ პრეისიადო კი დაამარცხა, მაგრამ მეორე წრეში უზბეკ მუხრიდინ ტილოვოვთან ვერაფერს გახდა და ასპარეზობას ისიც გამოეთიშა.
28 იანვარს პორტუგალიის გრან პრიზე სამი ქართველი ძიუდოისტი, გიორგი ჩიხელიძე, ლუკა კაპანაძე და ზაურ დვალაშვილი იასპარეზებენ.
