შვედეთის ნაკრების, „მილანის“, „მანჩესტერისა“ და „პარმას“ ყოფილმა ფეხბურთელმა იესპერ ბლომქვისტმა შვედეთში მასტერშეფის პროექტი მოიგო.

48 წლის ვეტერან ფეხბურთელს სამშობლოში საკუთარი პიცერია აქვს გახსნილი და ბოლო დროს კულინარიაში მოღვაწეობს. მან გამარჯვება მასტერშეფის იმ სეზონში მოახერხა, რომელშიც მონაწილეობას ცნობილი ადამიანები იღებდნენ.

„მშვენიერი მეტოქე მყავდა სამზარეულოს მაგიდასთან და ამაღელვებელი ფინალი იყო. მიუხედავად იმისა, რომ შედეგი ვიცოდი, ტელევიზორში ფინალში ყურებისას ოფლი მასხამდა. საოცრად ბედნიერი, მადლიერი და თავმდაბალი ვარ გამარჯვებით. კარ-ფრედრიკსაც შეეძლო მოგება, რთული და თანაბარი ფინალი იყო. მადლობა ყველას შესანიშნავი თავგადასავლისთვის“, - დაწერა ბლომქვისტმა სოციალურ ქსელში.

შეგახსენებთ, რომ იესპერ ბლომქვისტი კარიერის განმავლობაში „გიოტებორგის“, „მილანის“, „პარმას“, „მანჩესტერის“, „ევერტონის“, „ჩარლტონის“, „ენჩოპინგის“, „ჰამარბისა“ და „დიურგარდენის“ რიგებში თამაშობდა, 1994-2002 წლებში კი შვედეთის ნაკრებში 30 მატჩი ჩაატარა. მან 1999 წელს „მანჩესტერთან“ ერთად ტრებლი მოიგო.