ვეტერანმა იტალიელმა ფეხბურთელებმა ანტონიო კასანომ და კრისტიან ვიერიმ Bobo TV-ს ეთერში, რომელიც ვიერის ინტერნეტ არხია და სადაც, მასთან ერთად, საფეხბურთო საკითხებს კასანო, დანიელე ადანი და ნიკოლა ვენტოლა განიხილავენ, ხვიჩა კვარაცხელიაზე ისაუბრეს.

როგორც მათ თქვეს, ხვიჩას ნებისმიერ ევროპულ გრანდში თამაში შეუძლია და მისნაირი მარცხენა გარემარბი თანამედროვე ფეხბურთში ძალიან ცოტაა.

„კვარაცხელიაზე რა ვთქვა? ბიჭებო, მიჭირს ამაზე კომენტარის გაკეთება. ძალიან ძლიერია, ვიწრო და ფართო სივრცეებში, კარგად ურტყამს მარჯვენა და მარცხენა ფეხით, კარგად მოძრაობს ორივე მიმართულებით, მას ნებისმიერ გუნდში თამაში შეუძლია.

თუ გრილიში „მანჩესტერ სიტიშია“, მაშინ მასაც შეუძლია იქ ითამაშოს, მიუნხენის „ბაიერნშიც“ კარგად შეუძლია თამაში ან „ბარსელონაში“ ფერან ტორესის, უსმან დემბელეს ნაცვლად. შთამბეჭდავი ფეხბურთელია. 4-3-3 ან 4-2-3-1 სქემაში მარცხენა გარემარბის პოზიციაზე ასეთი ძლიერი ცოტა ფეხბურთელია. მან შთამბეჭდავი რაღაცები აჩვენა“, - თქვა კასანომ.

ანტონიოს დაეთანხმა Bobo TV-ის დამფუძნებელი და ავტორი, კრისტიან ვიერი: „ანტონიო არ აჭარბებს, კვარაცხელიას შეუძლია ყველა იმ გუნდში თამაში, რომლებსაც ადრე უკავშირებდნენ“.

შეგახსენებთ, მიმდინარე სეზონში ხვიჩა კვარაცხელიამ 11 შეხვედრაში 6 გოლი გაიტანა და 3 საგოლე პასი მიითვალა, ხოლო ორჯერ პენალტი მოიპოვა.