სტამბოლის „ფენერბაჰჩემ“ განცხადება გაავრცელა და ბოდიში მოიხადა საკუთარი გულშემატკივრების გამო, რომლებიც კიევის „დინამოსთან“ შეხვედრაში ვლადიმირ პუტინის სახელის სკანდირებდნენ. თურქული კლუბის განცხადებაში ნათქვამია, რომ ისინი ომს და ფანების საქციელსაც გმობენ.

„ჩვენი კლუბი იყო პირველი, რომელმაც რეაგირება მოახდინა სამხედრო პროცესზე, რომელიც 2022 წლის 24 თებერვალს დაიწყო. გვინდა, კიდევ ერთხელ ხაზგასმით აღვნიშნოთ, რომ ომი არ არის სიმამაცე, არამედ სიმხდალეა. არა ომს. ჩვენ ეს დავამტკიცეთ „შახტართან“ მატჩით და დავეხმარეთ უკრაინელებს მთელი მსოფლიო მასშტაბით.

მეორე ტაიმის შუაში მეტოქე ფეხბურთელების ზოგიერთმა ქმედებამ ტრიბუნებზე მღელვარება გამოიწვია, რომელიც ორ წუთს გაგრძელდა. თუმცა, როგორც არ უნდა იყოს, ჩვენ ვგმობთ იმას, რაც შემდეგ მოხდა. უსამართლო იქნება ტრიბუნების შეძახილები მთლიანად კლუბს მივაწეროთ. ჩვენი გულშემატკივრები ამით ჩვენს კლუბს ჩრდილს აყენებენ. ამასთან დაკავშირებით უნდა განვაცხადოთ, რომ სპორტი და პოლიტიკა ერთმანეთისგან უნდა გაიმიჯნოს“, - ნათქვამია განცხადებაში.

აქვე გეტყვით, რომ უეფამ გამოძიება დაიწყო იმ გულშემატკივრების გამო, რომლებიც სტადიონზე პუტინის სახელს სკანდირებდნენ. კიევის „დინამომ“ „ფენერბაჰჩე“ სტამბოლში დამატებით დროში 2:1 დაამარცხა. ამ გუნდების პირველი თამაში ფრედ იყო დასრულებული (0:0). უკრაინული გუნდი მესამე საკვალიფიკაციო ეტაპზე ოთარ კიტეიშვილის „შტურმს“ შეხვდება.