ევროპის 20-წლამდე ჩემპიონატი თავისუფალ ჭიდაობაში საქართველოს ნაკრებმა 8 მედლით დაასრულა, მაგრამ გულდასაწყვეტია, რომ ქართველებმა 5 ფინალიდან 4 წააგეს.
საქართველოს ნაკრები ევროპის ჩემპიონატზე 10-ვე წონით კატეგორიაში წარდგა და მხოლოდ 70 და 74 კგ-ში ვერ მოიპოვა მედალი. თუმცა, უმაღლესი სინჯის მედალს მხოლოდ დავით აბდალაძე დაეუფლა.
61 კგ წონით კატეგორიაში აბდალაძემ ერთმანეთის მიყოლებით დაამარცხა ჰუსეინ იბრაჰამი, ჰაიკ აბრამამიანი, დანიელ სანდუ და ხამზატ არსამეროევი. შედეგად, ოქროს მედალი მოიპოვა. ტურნირის ბოლო დღეს ქართველებს კიდევ 3 ოქროს შანსი ჰქონდათ, მაგრამ დანარჩენი სამი ფინალი ქართველებმა წააგეს.
დავით კოღუაშვილმა (86 კგ) ნანდო ჰაიდუჩი, ფარიდ ჯაბაროვი, ნაზარ დოდი დაამარცხა, ხოლო ფინალში რახიმ მაგამადოვთან წააგო. ანდრი მარგიშვილმა (92 კგ) ფინალამდე პატრიკ ვარტევა, ადამ იაკსიკი, სერგეი სარგსიანი და დენის საჰალიუკი დაამარცხა, მაგრამ ფინალში იონ დემიანთან მარცხი განიცადა. გადამწყვეტი შეხვედრა წააგო მერაბ სულეიმანაშვილმა ლიოვა გევორგიანთან, მანამდე კი ვოლოდიმირ დიაჩენკო და გეორგი ივანოვი დაამარცხა.
ბრინჯაოს მედლამდე ერთი ნაბიჯი დააკლდა ლუკა ჩხიტუნიძეს, რომელმაც გადამწყვეტ შეხვედრაში ვადიმ ტსურკანთან წააგო და მედალი ვერ მოიპოვა.
საქართველოს ნაკრებმა ევროპის 20-წლამდე ჩემპიონატი 1 ოქროს, 4 ვერცხლისა და 3 ბრინჯაოს მედლით დაასრულა და გუნდური პირველი ადგილი დაიკავა. აქვე შეგახსენებთ, რომ გუნდური პირველი ადგილი დაიკავა მანამდე ბერძნულ-რომაული სტილით მოჭიდავეთა ნაკრებმა, რომელმაც ევროპის ჩემპიონატი 2 ოქროს, 2 ვერცხლისა და 1 ბრინჯაოს მედლით დაასრულა.
