საერთაშორისო ოლიმპიურმა კომიტეტმა (IOC) ძალოსნობა, კრივი და თანამედროვე ხუთჭიდი ლოს ანჯელესის 2028 წლის ოლიმპიადისთვის ოლიმპიური სპორტის სახეობების წინასწარი სიიდან ამოიღო.
ამის შესახებ განცხადება აღმასრულებელი კომიტეტის სხდომაზე ლოზანაში თომას ბახმა განაცხადა. სამივე ფედერაციას 18-თვიანი ვადა განესაზღვრა, რომ არსებული პრობლემები მოაგვარონ, რათა 2028 წელს ოლიმპიურ თამაშებში ამ სახეობებში შეჯიბრებები გაიმართოს.
ძალოსნობას IOC-ს უკვე კარგა ხანია კორუფციისა და დოპინგსკანდალების გამო ემუქრებოდა და ახლა ძალოსნობის საერთაშორისო ფედერაციას (IWF) კონკრეტული ვადა განესაზღვრა, რომ არსებული პრობლემები აღმოფხვრან, წინააღმდგეგ შემთხვევაში 2028 წელს ოლიმპიადაზე ძალოსნობა წარმოდგენილი არ იქნება.
ეს საქართველოსთვის დიდი დარტყმა იქნება, რადგან ძალოსნობაში ყოველთვის გვყავდა მედლის პრეტენდენტი სპორტსმენები. 2016 წელს რიოში და მიმდინარე წელს ტოკიოში ლაშა ტალახაძემ სულაც ორი ოქროს მედალი მოიპოვა, ხოლო წელს ბრინჯაო ანტონ პლესნოიმ და 2016 წელს ირაკლი თურმანიძემ დაისაკუთრა.
ჯერჯერობით, საბოლოო გადაწყვეტილება მიღებული არაა და საერთაშორისო ოლიმპიური კომიტეტი განაჩენს 2023 წელს გამოაცხადებს. იქამდე, ძალოსნობის საერთაშორისო ფედერაციას ყველა პრობლემისა და ხარვეზის მოსაგვარებლად დრო მიეცა.
აქვე გეტყვით, რომ IOC-მა სკეიტბორდინგი, სერფინგი და სპორტული ცოცვა ლოს ანჯელესის ოლიმპიადის წინასწარ სიაში შეიყვანა, რითაც საერთაშორისო ოლიმპიური კომიტეტი ახალგაზრდა აუდიტორიის მოზიდვას ცდილობს.
