ლუის ჰამილტონმა ყატარში 102-ე გამრჯვება მოიპოვა და ამით, ფორმულა 1-ში მისივე რეკორდი გააუმჯობესა. მაგრამ იმავდროულად, კიდევ ერთი ახალი მიღწევა დააფიქსირა. - ლოსაილის ტრეკი 30-ეა, რომლებზეც ბრიტანელს რბოლა თუნდაც ერთხელ აქვს მოგებული.

ამ მხრივ, მეორე ადგილზე მიხაელ შუმახერია, ვისაც 23 სხვადასხვა ტრასაზე აქვს მოგებული. რა თქმა უნდა, ჰამილტონის მიერ მოგებული ტრასების სიმრავლეს ის გარემოება იწვევს, რომ კალენდარში ეტაპების რიცხვი განუხრელად იზრდება. გარდა ამისა, ჰამილტონის „ქისაში“ ახალმა ტრასებმა გასულ სეზონშიც მოიმატა, რომელშიც კორონავირუსის პანდემიის გამო, რბოლები რამდენიმე, მისთვის ახალ ტრეკზე ჩატარდა.

და ეს ყველაფერი არაა, რადგან მალე საუდის არაბეთის ჯედაში იასპარეზებს. მომავალ სეზონში კი კალენდარს მაიამის ეტაპი დაემატება. რა თქმა უნდა, ამ ტრასებზე გამარჯვება გარანტირებული არ აქვს, მაგრამ შანსი რეალურია.

ამ მაჩვენებლის მიხედვით, მესამე ადგილზე ალენ პროსტია, ვისაც 22 სხვადასხვა ტრეკზე აქვს მოგება. მას ერთით ჩამორჩება სებასტიან ფეტელი. შემდეგ არიან ნაიჯელ მენსელი და ფერნანდო ალონსო, რომლებსაც გამარჯვება 19 ტრეკზე აქვთ მოპოვებული. მხოლოდ მეშვიდე ადგილზეა აირტონ სენა, რომელმაც ფ1-ის დიდი პრიზები 17 ტრეკზე მოიგო.