ბელგიური „გენტის“ მთავარმა მწვრთნელმა ჰეინ ვანჰაეზებრუკმა გიორგი ჩაკვეტაძის წითელ ბარათზე კომენტარი გააკეთა. ქართველი ფეხბურთელი „ანტვერპენთან“ (0:1) მატჩში 33-ე წუთზე გააძევეს და კარიერაში ეს პირველად დაემართა. ბელგიელი სპეციალისტის აზრით კი, მსაჯს „ანტვერპენის“ ფეხბურთელიც უნდა გაეძევებინა.

„ჩაკვეტაძეს მეტოქეზე ზეწოლა უნდოდა, გერკენსი მას მოშორდა და ფეხი უკანა მხრიდან ჩაარტყა. ჩემთვის ეს შემთხვევითობა იყო. ფეხის წვერზე დაბიჯება ყვითელი ბარათია, ქუსლზე კი წითელი. მე ამაში მცირე განსხვავებას ვხედავ თუ განზრახ უხეშობა არ არის. თუმცა, წესებში ნათქვამია, რომ ეს წითელი ბარათია. მაგრამ 10-10-ის წინააღმდეგ უნდა გვეთამაშა. ჟელ ბატაილმა ნურიო ფორტუნაზე იუხეშა და ეს მეორე ყვითელი ბარათი უნდა ყოფილიყო.

ჩაკვეტაძის გაძევებამდე „ანტვერპენი“ მოედანზე არ არსებობდა, საწყის 30 წამს თუ არ ჩავთვლით. 3 ქულისთვის ჩამოვედით და დავიმსახურეთ. რაში იყო ჩვენი პრობლემა? დაბალ ეფექტიანობაში. ბოლო წუთზეც შეგვეძლო გატანა, შესანიშნავი საგოლე მომენტი გვქონდა“, - თქვა ვანჰაეზებრუკმა.

შეგახსენებთ, გიორგი ჩაკვეტაძეს შუა კვირაში კონფერენს ლიგის მატჩი გაუცდა, მაგრამ ბელგიის ჩემპიონატში ზედიზედ მესამედ იყო ძირითად შემადგენლობაში. გიორგის ანგარიშზე მიმდინარე სეზონში 9 თამაში და 2 საგოლე პასია. „გენტი“ 11 ქულით მე-14 პოზიციაზეა და მომდევნო ტურში, 17 ოქტომბერს, შინ „ეუპენს“ დაუპირისპირდება.