ხორვატიის ნაკრების ყოფილმა ფეხბურთელმა მარიო მანჯუკიჩმა კარიერა დაასრულა. მან ამის შესახებ სოციალურ ქსელში დაწერა.

მანჯუკიჩი ბოლოს „მილანის“ ღირსებას იცავდა, რომლის მაისურით გასულ სეზონში 11-ჯერ ითამაშა და გოლი არ გაუტანია. 35 წლის ფეხბურთელმა კარიერა „მარსონიაში“ დაიწყო, საიდანაც „ზაგრებში“ გადავიდა, შემდეგ კი ზაგრების „დინამოს“ მაისური მოირგო.

უცხოეთში მისი პირველი კლუბი „ვოლფსბურგი“ იყო, შემდეგ მიუნხენის „ბაიერნში“, მადრიდის „ატლეტიკოში“, „იუვენტუსსა“ და „ალ-დუჰაილში“ ითამაშა. ხორვატიის ნაკრებში 89 მატჩში 33 გოლი გაიტანა და 2018 წელს მსოფლიოს ვიცე-ჩემპიონი გახდა.

მანჯუკიჩი ხორვატიის, გერმანიისა და იტალიის ჩემპიონია, ასევე მოიგო ჩემპიონთა ლიგა და ამავე ტურნირის ორ სხვადასხვა ფინალში ორი სხვადასხვა გუნდის მაისურით შეძლო გოლის გატანა.