რუსეთის ქალაქ უფაში გამართული მსოფლიოს ახალგაზრდული ჩემპიონატი ჭიდაობაში დასრულდა და საქართველოს ნაკრებმა სამი მედალი მოიპოვა. ყველაზე წარმატებული ჩვენთვის ბოლო საშეჯიბრო დღე გამოდგა, როცა ქართველებმა ორი მედალი დაისაკუთრეს.
72 კგ წონით კატეგორიაში ფინალში გავიდა გიორგი ჩხიკვაძე, რომელმაც ბელარუსი ანდრეი კავალეუსკი (10:0), აზერბაიჯანელი ხასაი ჰასანლი (11:0) და სომეხი შანტ ხაჩატრიანი (8:1) დაამარცხა. ფინალში ჩხიკვაძის მეტოქე რუსი ევგენი ბაიდუსოვი იყო, რომელთაც ძალზე დაძაბულ ბრძოლაში 2:3 წააგო და ვერცხლის მედალს დასჯერდა.
82 კგ წონით კატეგორიაში ბრინჯაოს დაეუფლა საბა მამალაძე. მან აზერბაიჯანელ მურად აჰმადიევს 11:0 მოუგო, მეოთხედფინალში სომეხ კარენ ხაჩატრიანთან 1:8 წააგო, სომეხი ფინალში გავიდა და ქართველი რეპეშაჟში უნგრელ დომინიკ მეზეის შეხვდა, რომელსაც 11:2 აჯობა, ხოლო ბრინჯაოს მედლისთვის ინდოელი რავი მალიკი წუთზე ნაკლებ დროში 8:0 დაამარცხა და საქართველოს მესამე მედალი მოუტანა.
დღეს, ბრინჯაომდე ცოტა დააკლდა ლუკა ოჩიგავას (67 კგ), რომელმაც შვედი მიხალის ბარბანოსი 10:0 დაამარცხა, მერვედფინალში აზერბაიჯანელ ჰარსათ ჯაფაროვთან 3:12 წააგო, მაგრამ მისი მეტოქე ფინალში გავიდა და ქართველი რეპეშაჟში გაიყოლა, სადაც ფინელ ნესტორ კალე მანილას კი მოუგო, მაგრამ რუს მუსლიმ იმადაევთან 0:5 წააგო და ბრინჯაოს მედლისთვის ჭიდაობის უფლება ვერ მოიპოვა.
საქართველოს ნაკრები 10 მოჭიდავით იყო წარმოდგენილი და 2 ვერცხლის, 1 ბრინჯაოს მედალი მოიპოვა. გიორგი ჩხიკვაძემდე და საბა მამალაძამდე, გუშინ ვერცხლის მედალს დიეგო ჩხიკვაძე დაეუფლა. ვთქვათ ისიც, რომ თავისუფალ ჭიდაობაში საქართველოს ნაკრებმა, რომლის ღირსებას 9 მოჭიდავე იცავდა, ასპარეზობა უმედლოდ დაასრულა.
