ტოკიოს ოლიმპიადაზე კალათბურთში ვაჟთა ტურნირის ჯგუფური ეტაპი დასასრულს მიუახლოვდა. A და B ჯგუფში უკვე დასრულდა ასპარეზობა, დარჩენილია მხოლოდ C ჯგუფი.

აშშ-ს ნაკრებმა ბოლო ტურში ჯეისონ ტეიტუმის (27 ქულა) და კევინ დურანტის (23 ქულა, 8 მოხსნა, 6 პასი) ლიდერობით ჩეხეთს ადვილად, 119:84 მოუგო. არადა, გრეგ პოპოვიჩის გუნდმა თამაში ცუდად დაიწყო და პირველი პერიოდი 18:25 წააგო, მაგრამ დარჩენილ დროში ჩეხებმა ამერიკელთა შეჩერება ვერ მოახერხეს და წააგეს. შედეგად, A ჯგუფიდან საფრანგეთი პირველი, ხოლო აშშ მეორე ადგილით გავიდა. ჩეხეთმა მესამე პოზიცია დაიკავა და ჯერ შანსს ინარჩუნებს, რადგან სამი ჯგუფიდან ორი საუკეთესო მესამეადგილოსანი მეოთხედფინალში გავა.

B ჯგუფში იტალიამ ნიგერიას 80:71 აჯობა და მეორე ადგილზე გავიდა, რის შედეგადაც, პლეი-ოფის საგზური ოფიციალურად დაიბევა, ხოლო უმოტივაციო ავსტრალიამ გერმანიას მაინც აჯობა (89:76) და ჯგუფიდან ისე გავიდა, რომ ყველა თამაში მოიგო.

ტოკიოს ოლიმპიადაზე მეოთხედფინალის საგზური უკვე მოპოვებული აქვთ ავსტრალიას, საფრანგეთს, აშშ-ს, იტალიას, სლოვენიას და ესპანეთს, დარჩა ორი გუნდი ორივე მესამეადგილოსანი იქნება. 1 აგვისტოს, C ჯგუფში ესპანეთი და სლოვენია პირველი ადგილისთვის, ხოლო არგენტინა და იაპონია მესამე ადგილისთვის დაუპირისპირდებიან.