ქალაქ იუჯინში (შტატი ორეგონი) სტარტი აიღო ამერიკის მძლეოსანთა ოლიმპიურმა შესარჩევმა ტურნირმა, რომელზეც უკვე მსოფლიო რეკორდი დამყარდა. ტურნირის პირველივე დღეს, 28 წლის რაიან კროუზერმა ბირთვი 23.37 მეტრზე გასტყორცნა და წინა რეკორდი 25 სანტიმეტრით გააუმჯობესა.

აღსანიშნავია, რომ ძველი რეკორდი (23.12 მეტრი), რენდი ბარნსმა ორეგონელი კროუზერის დაბადებამდე ორნახევარი წლით ადრე დაამყარა. კროუზერისგან მსოფლიო რეკორდს დამყარებას, მის ყოველ გამოსვლაზე ელოდნენ, მაგრამ ასეთი შედეგი მაინც ბევრისთვის მოულოდნელობა გახდა. სხვათა შორის, კროუზერი დახურული არენებისთვისაც მსოფლიო რეკორდს ფლობს. ახალი რეკორდი მან მეოთხე ცდაზე დააფიქსირა.

„ვფიქრობ, ეს ჯერ კიდევ არაა ყველაფერი. წელს მე დახურული არენებისთვისაც დავამყარე რეკორდი, მაგრამ ამ ახალ მიღწევას, გაცილებით მეტი ფასი აქვს, რადგან მისკენ ძალიან დიდხანს მივისწრაფოდი“, - განაცხადა კროუზერმა, ვინც რა თქმა უნდა, ტოკიოს საგზურიც გაინაღდა. მასთან ერთად, ტოკიოს ოლიმპიადაზე კიდევ ერთი ამერიკელი, ჯოი კოვაჩი და პეიტონ ოტერდალიც იასპარეზებენ, რომლებმაც შესაბამისად, მეორე და მესამე ადგილები დაიკავეს.

კროუზერმა და კოვაჩმა რიოს 2016 წლის ოლიმპიადაზე პირველი და მეორე ადგილები დაიკავეს და სავარაუდდ, ოქროსთვის ტოკიოშიც ისინი იბრძოლებენ.