ფეხბურთი

16:02 | 23.04.2021 | ნანახია [] - ჯერ

ლეონიდ სლუცკი: "კვარაცხელიას ტრავმა მსაჯის ბრალია"

ყაზანის „რუბინის“ მთავარმა მწვრთნელმა ლეონიდ სლუცკიმ ხვიჩა კვარაცხელიას ტრავმაზე კომენტარი გააკეთა. რუსი სპეციალისტი ფიქრობს, რომ ქართველი ფეხბურთელის დაზიანება მსაჯის ბრალია. სლუცკის თქმით, „ურალთან“ არბიტრმა ხვიჩაზე მეტოქეების მხრიდან უხეშობებს ყურადღება არ მიაქცია, რამაც ტრავმა გამოიწვია.

„მარტივი მომენტია: ფეხბურთი გულშემატკივრებისთვისაა, ყველა ლიგაში ვარსკვლავებს უფრთხილდებიან. აშკარაა, რომ ქომაგები სტადიონზე კვარაცხელიას გამო დადიან. თამაშზე „ურალის“ 10 ათასზე მეტი გულშემატკივარი იყო და დარწმუნებული ვარ, რომ ბევრი მათგანი ხვიჩა კვარაცხელიას სანახავად მოვიდა. როდესაც საწყის 15 წუთში კვარაცხელიას სამჯერ ეუხეშნენ, იდაყვებს ურტყამდნენ, უკნიდან ურტყამდნენ... ტრავმამდეც მას „ურალის“ ფეხბურთელი ეუხეშა.

კიდევ ერთხელ ვამბობ - ნახეთ, როგორ ზრუნავენ ნებისმიერ ვარსკვლავზე სხვა ქვეყნებში. ყველა მსაჯმა იცის, რომ გულშემატკივარი სტადიონზე ფეხბურთელისთვის მიდის და არა მსაჯის ან სხვა რამის გამო. და, ამ დროს ერთი სულელი ადამიანი არ დებს ჯარიმას ხვიჩაზე უხეშობების გამო... მჯერა, რომ ტრავმა, რომელიც კვარაცხელიამ მიიღო, მეტწილად მსაჯმა გამოიწვია. აშკარად სიტუაციებშიც კი მან ჯარიმა არ დანიშნა“, - თქვა სლუცკიმ.

შეგახსენებთ, რომ ხვიჩა კვარაცხელია სავარაუდოდ მიმდინარე სეზონში ვერ ითამაშებს. მას რამდენიმე კვირა გაუცდება, ხოლო რუსეთის პრემიერლიგა ზუსტად 3 კვირაში სრულდება. ხვიჩას მიმდინარე სეზონში 23 მატჩში 4 გოლი, 4 საგოლე პასი და 4 მოპოვებული პენალტი აქვს საკუთარ ანგარიშზე.

0.116379