თელ-ავივის გრან სლემმა საქართველოს დელეგაციისთვის კარგად დაიწყო და პირველი დღის მონაგარი ორი მედალია. ვაჟთა შორის თემურ ნოზაძემ, ხოლო ქალთა შორის ეთერ ლიპარტელიანმა შეძლეს კვარცხლბეკზე ასვლა.
60 კგ წონით კატეგორიაში ნოზაძემ ასპარეზობა ფელიპე პელიმის ძლევით დაიწყო, რასაც თურქ მიჰრაც აკკუს აჯობა, ხოლო მეოთხედფინალში ბრიტანელი ეშლი მაკენზი დაამარცხა და ნახევარფინალში გავიდა, სადაც უკვე უკრაინელ არტემ ლესიუკს მოუგო. ფინალში ნოზაძე აზერბაიჯანელ დავუდ მამადსოისთან დამაცხდა და ვერცხლის მედალი დაისკუთრა.
66 კგ წონით კატეგორიაში გიორგი ბაზანდარაშვილი პირველ წრეში უნგრელ დანიელ შეგედის აჯობა, მაგრამ შემდეგ რუს მურად ჩოპანოვთან მარცხი განიცადა და ასპარეზობა დაასრულა. ამავე წონაში ბაგრატ ნინიაშვილი მეორე წრიდან ჩაერთო ასპარეზბაში და უზბეკ მუხრიდან ტილოვოვთან წააგო.
ქალთა შორის 3 ქართველი ძიუდოისტი გავიდა ტატამზე. 52 კგ წონით კატეგორიაში მარიამ ჯანაშვილი ასპარეზობას პირველივე წრეში რუს ალესია კუზნეცოვასთან მარცხით გამოეთიშა, ხოლო ტატიანა ლევიცკა-შუკვანი ებრაელ გილი კოენთან დამარცხდა.
სამაგიეროდ, 57 კგ წონით კატეგორიაში ბრინჯაოს მედალი მოიპოვა ეთერ ლიპარტელიანმა. მან ჯერ რუსი დიანა ჟიგაროსი დაამარცხა, მერე პოლონელ ანა კუშერას აჯობა, ხოლო მეოთხედფინალში უნგრელი ჰედვინგ კარაკასი დაამარცხა. ნახევარფინალში ეთერი მასპინძელ ტიმნა ნელსონ ლევისთან დამარცხდა და რეპეშაჟში გადაინაცვლა, სადაც პოლონელ ჯულია კოვალშიკს აჯობა. შედეგად, ლიპარტელიანმა გრან სლემზე მედალი კარიერაში პირველად მოიპოვა.
