ტურინის „იუვენტუსის“ მთავარმა მწვრთნელმა ანდრეა პირლომ „ნაპოლისთან“ (0:1) მარცხის შემდეგ კომენტარი გააკეთა. 41 წლის სპეციალისტის განცხადებით, მისმა გუნდმა კარგად ითამაშა და ისე წააგო, რომ „ნაპოლის“ ტურინელთა კარში არც დაურტყამს.

„კარში დარტყმაც არ მიგვიღია და წავაგეთ საეჭვო ეპიზოდის გამო, მაგრამ კარგი მატჩი გვქონდა, ბევრი საგოლე მომენტი შევქმნით, სამწუხაროა, რომ გოლის გატანა ვერ შევძელით, მაგრამ თამაშით კმაყოფილები ვართ. მხოლოდ იმის გამო ვწუხვართ, რომ გოლის გატანა ვერ შევძელით.

პენალტი რატომ მიმაჩნია საეჭვოდ? იმის გამო, რომ გამოდის საჯარიმოში კონტაქტი საერთოდ არ შეიძლება, თუ ვინმე ხელს გაშლის და ბურთს მეკარე ხელში დაიჭერს, ყველა პენალტი უნდა დაინიშნოს. მსურდა მენახა ასეთი პენალტი ჩვენს სასარგებლოდ დაენიშნათ, რასაც უამრავი დაპირისპირება და პოლემიკა მოჰყვებოდა. არ ვიცი მოგვცემდნენ თუ არა ასეთ პენალტს, მაგრამ ფაქტია „იუვენტუსის“ თამაშებზე გარკვეულ სიტუაციებს მსაჯები განსხვავებულად აფასებენ. თუმცა, ახლა წინ უნდა ვიყუროთ და თამაშით კმაყოფილები ვართ. ახლა ოთხშაბათს მნიშვნელოვანი მატჩი გველოდება და ამაზე ვამახვილებთ ყურადღებას“, - თქვა პირლომ.

შეგახსენებთ, რომ „იუვენტუსს“ 42 ქულა აქვს და სატურნირო ცხრილის ლიდერ „მილანს“ 7 ქულით ჩამორჩება („როსონერის“ თამაშით მეტი აქვს ჩატარებული), რომელიც ამავე ტურში „სპეციასთან“ 0:2 დამარცხდა. „იუვე“ უახლოეს მატჩს ჩემპიონთა ლიგის მერვედფინალში „პორტუსთან“ სტუმრად გამართავს.