ჩემპიონთა ლიგის ჯგუფური ეტაპის წილისყრა გაიმართა და ალბათ, ეჭვგარეშეა, რომ ყველაზე საინტერესო დაპირისპირება G ჯგუფში შედგება: „იუვენტუსი“ – „ბარსელონა“.

ამ გუნდების უდიდესი ისტორიიდან გამომდინარე თავისთავად უკვე საინტერესო დუელია, მაგრამ ახლა კიდევ ერთი და მაგარი ფაქტორი ყველაფერს უფრო დიდი ინტრიგას მატებს: კრიშტიანუ რონალდუ VS ლიონელ მესი.

ორივე მხარეს მსოფლიოს საუკეთესო ფეხბურთელი, ორი ჩემპიონი ასაკის გარეშე, ნათელია, რომ მზად არიან 180-წუთიანი ბრძოლისთვის. ისე, როგორც ადრე, ლა ლიგაში... თუმცა, ახლა უფრო საინტერესოც იქნება, ქომაგს მენატრა ტიტანთა პირადი დუელი მწვანე მინდორზე.

კრიშტიანუ და მესი უშუალოდ ჩემპიონთა ლიგაზე აქამდე ერთმანეთს 5-ჯერ შეხვედრიან და 2-ჯერ არგენტინელმა იმარჯვა, 2-ჯერ ფრე დაფიქსირდა და ერთი გამარჯვება პორტუგალიელს დარჩა. ბოლოს ისინი ჩემპიონთა ლიგაზე 9 წლის წინ, 2010-2011 წლების სეზონის ნახევარფინალში დაუპირისპირდნენ (მანამდე 2007-2008 და 2008-2009 წლების სეზონში).

გარდა ამისა, ორივე გუნდში ცვლილებების პროცესი და გარდამავალი პროცესია: ერთის მხრივ ანდრეა პირლო და მეორეს ხმრივ - რონალდ კუმანი. ორივეს სურს გამარჯვება ლამაზი ფეხბურთით, მართლაც საინტერესო იქნება. ნუ დავივიწყებთ მირალემ პიანიჩსა და არტურს, რომლებმაც კლუბები სულ ცოტა ხნის წინ გაცვალეს.

საერთოდ, „იუვე“ და „ბარსა“ ბოლო პერიოდში ერთმანეთს ხშირად ხვდებიან. 2014-2015 წლების სეზონში ესპანელებმა ფინალში 3:1 იმარჯვეს, ორი წლის შემდეგ ტურინელებმა რევანში მეოთხედფინალში აიღეს (3:0, 0:0), ხოლო 2017-2018 წლების სეზონში ჯგუფურ ეტაპზე უფრო ძლიერნი კატალონელები აღმოჩნდნენ (3:0, 0:0).

მთლიანობაში „ბარსელონა“ და „იუვენტუსი“ ევროთასებზე ერთმანეთს 11-ჯერ შეხვედრაინ და მცირე უპირატესობა „ბლაუგრანას“ მხარესაა - 4 მოგება, 4 ფრე და 3 გამარჯვება „იუვენტუსის“ ანგარიშზე. ვნახოთ შეძლებენ თუ არა ტურინელები და კრიშტიანუ "ბარსელონასთან" და მესისთან ურთიერთშეხვედრებში ბალანსის გამოსწორებას...