ალბანური „ტირანას“ პრეზიდენტი რეფიკ ჰალილი ჩემპიონთა ლიგაზე „დინამო თბილისთან“ შეხვედრით კმაყოფილია. ის მიიჩნევს, რომ მის გუნდს გაუმართლა და გამარჯვებას გეგმავს.

„კმაყოფილი და მშვიდად ვარ. მსოფლიოში პანდემია ისევ არსებობს, მაგრამ ფეხბურთი გრძელდება და ეს სწორია, თუ წესებს დავიცავთ. ვიცოდით ვინ შეიძლებოდა შეგვხედროდა და წილისყრის შედეგით კმაყოფილი ვარ. „დინამოსთან“ ადრეც ვითამაშეთ და ვიმარჯვეთ, იმედია ახლაც ასე იქნება. მომდევნო კვირაში სამ ახალ ფეხბურთელს დავიმატებთ. ვიმედოვნებ, რომ ყველა ფეხბურთელი მწყობრში იქნება და საქართველოში მობილიზებულები ჩავალთ“, - აღნიშნა ჰალილიმ.

• "ტირანას" მწვრთნელი: "დინამოს" დამატებითი იარაღი აქვს, მაგრამ შეგვიძლია ისევ დავამარცხოთ"

აქვე გეტყვით, რომ 2003-2004 წლების სეზონში „დინამო თბილისმა“ „ტირანა“ შინ ლევან მელქაძის, გიორგი ანჩაბაძისა და ვიტალი დარასელიას გოლებით 3:0 დაამარცხა. თუმცა, ზუსტად ერთ კვირაში სუად ლიჩის, ინდრიტ ფორტუზისა და მაჰირ ჰალილის გოლებით ალბანელებმა ორი მატჩის ჯამში ანგარიში გაათანაბრეს. პენალტების სერიაში კი „ტირანას“ 4:2 მოიგო, თბილისელთაგან პენალტები ალექსანდრე გოგობერიშვილმა და ლადო ახალაიამ ვერ გაიტანეს.

„დინამო თბილისისა“ და „ტირანას“ ახლანდელი დაპირისპირება თბილისში 18 ან 19 აგვისტოს გაიმართება და მომდევნო ეტაპზე გამსვლელის ვინაობაც ამავე მატჩში გაირკვევა.