ტურინის „იუვენტუსი“ და „ბარსელონა“ ფეხბურთელების გაცვლაზე პრაქტიკულად შეთანხმდნენ. მირალემ პიანიჩი „ბლაუგრანაში“ გადავა, არტურ მელო - „ბიანკონერიში“.
Gazzetta Dello Sport-ის ინფორმაციით, დამდეგ უიქ-ენდზე ფეხბურთელები ტურინში ან ბარსელონაში სამედიცინო შემოწმებას გაივლიან.
გარიგების თანახმად, „ბარსა“ არტურის სანაცვლოდ პიანიჩს და 10 მილიონ ევროს მიიღებს. ბრაზილიელის ანაზღაურება ტურინში 5.5 მილიონი ევრო იქნება, ხოლო ბოსნიელის პირადი კონტრაქტის დეტალები უცნობია.
ცხადია, ორივე ფეხბურთელი კლუბებს სეზონის ბოლომდე არ შეიცვლიან. საინტერესო დეტალია ისიც, რომ არტურმა იტალიაში გადასვლაზე თანხმობა განაცხადა და ბარტერის წარმატებით დახურვას გზაც ამან გაუხსნა.
შეგახსენებთ, პიანიჩი „იუვენტუსში“ 2016 წლიდან (170 მატჩი, 22 გოლი), არტური კი „ბარსელონაში“ 2018 წლიდან თამაშობს (71 მატჩი, 4 გოლი).
