საქართველოს ნაკრების ნახევარმცველმა ოთარ კიტეიშვილმა შვეიცარიასთან და ხორვატიასთან მატჩების წინ კომენტარი გააკეთა. ქართველი ფეხბურთელის განცხადებით, უახლოესი ორი მატჩი საქართველოს ნაკრებმა ერთა ლიგის პლეი-ოფებისთვის მოსამზადებლად უნდა გამოიყენოს.
„შვეიცარიის ნაკრები ძლიერი გუნდია, ევროპული ფეხბურთის ერთ-ერთი გრანდი. მათ წინააღმდეგ გამართულ პირველ შეხვედრაში ისეთი თამაში ვერ ვაჩვენეთ, როგორიც გვსურდა და 0:2 დავმარცხდით. იმ მატჩში შვეიცარიამ, ასე ვთქვათ, გვაჯობა, მაგრამ ახლა შევეცდებით, რომ მაქსიმალურად დავიხარჯოთ, გამოვავლინოთ ჩვენი შესაძლებლობები და სასურველი შედეგი დავაფიქსიროთ. მიმდინარე წელს ერთი ოფიციალური და ერთი ამხანაგური შეხვედრა დაგვრჩა. ჩემი აზრით, ეს მატჩები მაქსიმალურად უნდა გამოვიყენოთ იმისთვის, რომ მარტში გასამართ ერთა ლიგის პლეი-ოფებს იდეალურ ფორმაში შევხვდეთ“, - ციტირებს კიტეიშვილის სიტყვებს სფფ-ის ვებგვერდი.
შეგახსენებთ, საქართველოს ნაკრები 15 ნოემბერს, შვეიცარიას ესტუმრება და ევრო 2020-ის შესარჩევ ციკლს დაასრულებს, ხოლო ოთხი დღის შემდეგ ამხანაგურად ხორვატიას გაეჯიბრება.
