ლონდონის „ტოტენჰემის“ მთავარმა მწვრთნელმა მაურისიო პოჩეტინომ „ლივერპულთან“ ჩემპიონთა ლიგის ფინალამდე პრესკონფერენცია გამართა. არგენტინელი სპეციალისტის განცხადებით, მისმა გუნდმა ბევრი დაბრკოლება გადალახა და ახლა ისტორიის დაწერა უნდათ.

„კეინი? არ ვიცი, ერთი ვარჯიში კიდევ დარჩენილია, მხოლოდ ამის შემდეგ მივიღებთ გადაწყვეტილებას. „ლივერპული“? ჩვენ ვსაუბრობთ დიდ გუნდზე, რომელიც ინგლისში „მანჩესტერ სიტისთან“ ერთად საუკეთესოა. ისინი ფინალში ერთი წლის წინაც იყვნენ, კლოპი და მისი ბიჭები დიდებას იმსახურებენ. ჩვენ კი ვეცდებით სასიამოვნო ფეხბურთით ვისიამოვნოთ, გამარჯვება მოვიპოვოთ, გვინდა ისტორია დავწეროთ.

შემადგენლობა? ნორმალურია, რომ ეს კითხვები გაქვთ. ჩემს ადგილზე ყოფნა ადვილი არაა, გარკვეული გადაწყვეტილებები უნდა მივიღო. ხვალ გვექნება ყველა სახის ინფორმაცია და ვეცდებით საუკეთესო გადაწყვეტილება მივიღოთ. 11 ფეხბურთელის შერჩევა მტკივნეული იქნება. ხვალ მილიონობით ადამიანს უნდა ვუჩვენოთ ჩვენი ხარისხი. ფეხბურთი კოლექტიური სპორტია, ყველა ფეხბურთელი მნიშვნელოვანია. იმ მოთამაშეების ენერგიაც მნიშვნელოვანი იქნება, რომლებიც არ ითამაშებენ.

არ შეიძლება ჩემპიონთა ლიგისთვის ისე მომზადება, როგორც დანარჩენი მატჩებისთვის. ყურადღება და კონცენტრაცია განსხვავებული იქნება. ფუნდამენტურია მზად ვიყოთ, მიუხედავად იმისა, რომ მილიონობით ადამიანის ეპიცენტრში ვიქნებით. ამაზე არ უნდა ვიფიქროთ და მხოლოდ გუნდურ თამაშზე ვიფიქროთ.

„აიაქსთან“ ქამ-ბექი გვიჩვენებს გუნდის ხასიათს. აქამდე მოსვლა ბევრი რამითაა განპირობებული. ჩვენ გადავწყვიტეთ არავინ გვეყიდა და არავინ გაგვეყიდა. მხოლოდ დემებელ წავიდა, რომელსაც თავად უნდოდა სხვაგან თამაში. ჩვენ არ გვქონია საკუთარ მოედანზე თამაშის შესაძლებლობა, ვთამაშობდით „უემბლიზე“, სადაც იყო ორგანიზაციული პრობლემები, მაგრამ მიუხედავად ამისა, ეს გვაძლიერებდა. დავამტკიცეთ, რომ ფეხბურთში მძიმე შრომა ფასდება.

კლოპი? ეს წარმოუდგენელია. 10 თვის წინ ვერც წარმოვიდგენდი, რომ აქ ვიქნებოდი. იურგენი წარმატებული მწვრთნელია. სპონტანური, ბუნებრივი, მაგრამ ასევე ცოტა იღბლიანიც. ეს მისთვის მესამე ფინალია, კომპლიმენტი დაიმსახურა. ჩვენ კი აქ გამარჯვებისთვის ვათ, მაგრამ ვფიქრობ ჩემპიონთა ლიგის ფინალში თამაში ყველაზე რთულია“, - თქვა პოჩეტინომ.

შეგახსენებთ, რომ „ლივერპულისა“ და „ტოტენჰემის“ ფინალური შეხვედრა 1-ელ ივნისს, მადრიდში, თბილისის დროით 23:00 საათზე გაიმართება.