კატალონიის „ბარსელონამ“ ესპანეთის სამეფო თასის ფინალში „ვალენსიასთან“ წააგო, მაგრამ კოლუმბიელმა მცველმა ჯეისონ მურილომ ოქროს მედალი მაინც მიიღო. დიახ, მურილო იანვრიდან მოყოლებული „ბარსას“ ფეხბურთელია და მისი გუნდი ფინალში დამარცხდა, მაგრამ თვითონ მაინც გამარჯვებული გამოვიდა.
საქმე ისაა, რომ მურილო იანვრამდე „ვალენსიას“ ღირსებას იცავდა და კოპა დელ რეიზე „ღამურების“ მაისური ორჯერ მოირგო, რისთვისაც საჩემპიონო მედალი მაინც გადაეცა. სხვათა შორის, „ვალენსიას“ საზეიმო მაისურებზე ფეხბურთელების გვარები ეწერა და მათ შორის, ჯეისონ მურილოც იყო მოხსენიებული... ასე რომ, კოლუმბიელმა ერთ სეზონში ესპანეთის ჩემპიონობა და თასი სხვადასხვა გუნდების რიგებში მოიპოვა.
შეგახსენებთ, მურილო „ვალენსიადან“ „ბარსელონაში“ იანვარში იჯარით გადავიდა და კატალონელთა რიგებში მხოლოდ 4 თამაში ჩაატარა. მისი გამოსასყიდი თანხა 25 მილიონი ევროა, მაგრამ ნაკლებ სავარაუდოა, რომ „ბლაუგრანამ“ ეს ნაბიჯი გადადგას.
აქვე გეტყვით, რომ „ვალენსიამ“ „ბარსელონა“ თასის ფინალში 2:1 დაამარცხა და 2008 წლის შემდეგ პირველი ტიტული მოიგო.
