ესპანეთის ფეხბურთის ფედერაციამ დააანონსებული ცვლილება ესპანეთის სუპერთასის ფორმატთან დაკავშირებით ოფიციალურად დაამტკიცა. ამიერიდან, სუპერთასზე ოთხი გუნდი ითამაშებს და არა, როგორც აქამდე იყო, მოქმედი ჩემპიონი და თასის მფლობელი.
ფორმატის თანახმად, ნახევარფინალში 2020 წლის 8 იანვარს, თასის გამარჯვებული ქვეყნის ვიცე-ჩემპიონს გაეჯიბრება ფინალისთვის, ხოლო მეორე დღეს ერთმანეთს ქვეყნის ჩემპიონი და თასის ფინალისტი დაუპირისპირდებიან.
იმ შემთხვევაში თუ ჩემპიონიც და თასის მფლობელიც ერთი გუნდი გახდება, გამოყოფილ ადგილს სატურნირო ცხრილში ჩემპიონთან ყველაზე ახლოს მდგომი გუნდი შეავსებს.
ჯერჯერობით უცნობია ტურნირის მასპინძელი ადგილი, მაგრამ ადგილობრივი მედიის ცნობით, პირველად აღნიშნული ფორმატის ესპანეთის სუპერთასს საუდის არაბეთი უმასპინძლებს.
