გერმანიის ბუნდესლიგის 29-ე ტურის შემდეგ ლიდერი უცვლელია. „დორტმუნდის“ გამარჯვებას გამარჯვებითვე უპასუხა „ბაიერნმა“, რომელიც დიუსელდორფში „ფორტუნა“ ადვილად დაამარცხა და სეზონის დასრულებამდე 5 ტურით ადრე ლიდერია.

„რეკორდმაისტერმა“ პირველ წრეში დიუსელდორფელებთან დაუგეგმავი ორი ქულა გაანიავა (3:3) და ბუნებრივია, ახლაც იგივე არ სურდა. ამიტომ, ნიკო კოვაჩის გუნდი მოედანზე უფრო მეტად კონცენტრირებული და მოტივირებული გავიდა. თანაც, მაშინდელთან შედარებით „ბაიერნი“ ახლა უკეთესი ფორმაშია. შეხვედრის ბედი პირველი ტაიმში გადაწყდა, რადგან კინგსლი კომანმა დუბლი შეასრულა. მეორე ნახევარში ვითარება არ შეცვლილა და „ბაიერნმა“ უპირატესობა კიდევ უფრო გაზარდა. მიუნხენელთა აქტივში ახლა 67 ქულაა, „დორტმუნდს“ 66 ქულა აქვს.

ფრანკფურტის „აინტრახტს“ აქამდე საქმეები ჩინებულად მისდიოდა, მაგრამ ბოლო დროს რაღაც აირია. სამი დღის წინ ევროპა ლიგაზე „ბენფიკასთან“ მტკივნეული მარცხი განიცადა, რასაც ბუნედლიგაში წარუმატებელი გამოსვლაც მიაყოლა. არადა, „აინტრახტი“ „აუგსბურგთან“ აშკარა ფავორიტი გახლდათ და მალევეც დაწინაურდა პასიენსიას გოლით. თუმცა, მერე გოლები მხოლოდ სტუმრებს გაჰქონდათ და საბოლოოდ - 1:3. „აინტრახტი“ რჩება ოთხეულში, მაგრამ „გლადბახი“ იქვეა ჩასაფრებული.

„ჰოფენჰაიმი“ კი ევროპა ლიგის ზონას ბერლინის „ჰერტასთან“ დამაჯერებელი გამარჯვებით დაუბრუნდა და ბოლო ტურებს წარმატებით თუ ჩაატარებს, ვინძლო ჩემპიონთა ლიგის საგზურსაც გამოჰკრას ხელი.

„ჰოფენჰაიმი“ – „ჰერტა“ 2:0 (1:0)

გოლები: 1:0 ამირი (29), 2:0 ნელსონი (76)

„დიუსელდორფი“ – „ბაიერნი“ 1:4 (0:2)

გოლები: 0:1 კომანი (15), 0:2 კომანი (41), 0:3 გნაბრი (55), 1:1 ლუკებაკიო (89, პენ), 1:4 გორეცკა (90)

„აინტრახტი“ – „აუგსბურგი“ 1:3 (1:2)

გოლები: 1:0 პასიენსია (14), 1:1 რიტერი (31), 1:2 რიტერი (45), 1:3 გრეგორიტში (84)