გოგა ბითაძის “ბუდუჩნოსტმა” ევროლიგაში განცდილი ზედიზედ 6 მარცხის მერე, ნანატრი გამარჯვება იზეიმა. შესაბამისად, ახალგაზრდა ქართველი ცენტრისთვის, რომელიც პოდგორიცელთა რიგებში არცთუ დიდი ხნის წინ გადაბარგდა, ევროპული კალათბურთის უმთავრეს საკლუბო ტურნირში, ეს, პირველი წარმატებული თამაში იყო.

“ბუდუჩნოსტმა” შინაურ კედლებში ევროლიგის აუტსაიდერი “დარუშაფაკა” მიიღო და გამარჯვება ხელიდან ზედ ბოლო წამებზე გამოგლიჯა – 75:74. სასიხარულოა, რომ გოგამ მოგებაში სოლიდური წვლილი შეიტანა.
ბითაძე თამაშში სათადარიგოთა სკამიდან ჩაერთო და 26:31 წუთში 11 ქულა, 4 მოხსნა (2 შეტევაში), 1 ჩაჭრა და 4 დაფარება მიითვალა. ქართველმა ლეგიონერმა 6-დან 4 ორქულიანი და 4-დან 3 საჯარიმო ჩააგდო, სამქულიანი ააცილა, ბურთი ერთხელ დაკარგა, 3 პერსონალური ფოლი მიიღო, მის წინააღმდეგ კი 5-ჯერ დაჯარიმდნენ.
შედეგად, გოგას სარგებლიანობის კოეფიციენტი 17-ს გაუტოლდა და ის მასპინძელთა რიგებში მხოლოდ საფრანგეთის ნაკრების გამთამაშებელ ედვინ ჯეკსონს (22) ჩამორჩა, რომელმაც 18 ქულა ჩააგდო. ისიც ვთქვათ, რომ გამარჯვების მომტანი ტყორცნა ამერიკელმა ნორის კოულმა მიითვალა, რომლის მონაგარიც 17 ქულა იყო.
“ბუდუჩნოსტმა” 4 მოგება და 14 მარცხი მოაგროვა და ევროლიგის სატურნირო ცხრილში კვლავაც ბოლოსწინა მე-15 ადგილზე რჩება, მომდევნო შეხვედრას კი 18 იანვარს, ისევ შინ, მადრიდის “რეალთან” გამართავს. მანამდე, 14 იანვარს, ადრიატიკის ლიგის ეგიდით, პოდგორიცელები სერბულ ფმპ-ს ესტუმრებიან.