ქართულმა საჭადრაკო კლუბმა “ნონამ” ევროპის ჩემპიონატის ფინალში “მონტე კარლოსთან” ფრედ ითამაშა, თუმცა, ტურნირის აბსურდული წესებიდან გამომდინარე, ვერცხლის მედლებს დასჯერდა.

გადამწყვეტ შერკინებაში ნანა ძაგნიძე (2509) შავი ფიგურებით უკრაინელ ანა მუზიჩუკთან (2555) დამარცხდა, ნინო ბაციაშვილმა (2482) თეთრებით შვედ პია კრამლინგს (2465) მოუგო, ლელა ჯავახიშვილი (2475) პოლონელ მონიკა სოცკოს (2451) დაუზავდა, ხოლო ბელა ხოტენაშვილმა (2469) ყაიმი ლიტველ დეიმანტე კორნეტესთან (2462) გააფორმა.

აქ საქმეში უკვე ევროპის პირველობის რეგლამენტი ჩაება, რომლის მიხედვითაც ჩემპიონად მონაკოს გუნდი გამოცხადდა. საქმე ის გახლავთ, რომ ფინალში ყაიმის შემთხვევაში, გამარჯვება იმ გუნდს ენიჭებოდა, რომლის წარმომადგენელიც უფრო მაღალ დაფაზე იმარჯვებდა. შესაბამისად, გადამწყვეტი მუზიჩუკის ძაგნიძესთან მოგება აღმოჩნდა.

შედეგად, “მონტე კარლო”, რომელიც ამჯერად ჩინელი ჰოუ იფანის გარეშე ირჯებოდა, ევროპის საკლუბო ჩემპიონატის გამარჯვებული მეშვიდედ გახდა, ამ მხრივ კი, მე-2 ადგილზე სწორედ “ნონა” გახლავთ, რომელსაც შეჯიბრი 3-ჯერ მოუგია. ვთქვათ ისიც, რომ ოქროს მედლები 2-ჯერ აქვს მოპოვეული თბილისურ NTN-ს.