ლეგენდარულმა ინგლისელმა ფეხბურთელმა ჯონ ტერიმ საფეხბურთო კარიერა დაასრულა. ამის შესახებ განცხადება 37 წლის მცველმა ინსტაგრამის გვერდიდან გააკეთა:
„23 საოცარი წლის შემდეგ გადავწყვიტე, რომ საფეხბურთო კარიერა დავასრულო“, - დაწერა ინგლისელმა.
ჯონ ტერიმ თითქმის მთელი კარიერა ლონდონის „ჩელსიში“ გაატარა, რომლის რიგებშიც 1998-2017 წლებში 717 თამაშში მიიღო მონაწილეობა და 67 გოლი გაიტანა. კარიერის ბოლო სეზონი კი ბირმინგემის „ასტონ ვილაშ“ დაჰყო (36 მატჩი, 1 გოლი).
ინგლისის ეროვნულ ნაკრებში ჯონმა 2003-2012 წლებში 78 შეხვედრა ჩაატარა და 6-ჯერ დაამწუხრა მეტოქეები.
რაც შეეხება ტიტულებს, ხუთ-ხუთჯერ მოიგო ინგლისის პრემიერლიგა და ინგლისის ასოციაციის თასი, სამჯერ ინგლისის ლიგის თასი, ერთხელ ინგლისის სუპერთასი, ჩემპიონთა ლიგა და ევროპა ლიგა.
