სასტუმრო მოხალისეში უეფას მწვრთნელთა განათლების A ლიცენზიის მეორე მოდული მიმდინარეობს. სწავლების ამ ეტაპზე კურსანტები შემდეგ საკითხებს განიხილავენ: მეკარეები, ორთაბრძოლები, შეტევის ორგანიზება, უსაფრთხოება, მედია და მართვის საფუძვლები ფეხბურთში.
შეგახსენებთ, რომ უეფას მწვრთნელთა განათლების A ლიცენზიის კურსი განახლებული ფორმატით პირველად ტარდება. ამ ეტაპზე სასწავლო კურსზე 20 ლიცენზიის მაძიებელი ირიცხება. მსმენელებს ერთწლიანი სასწავლო პროგრამის შემდეგ, გამოცდების წარმატებით ჩაბარების შემთხვევაში, უეფას ერთ-ერთი უმაღლესი სამწვრთნელო ლიცენზია გადაეცემათ.
ლევან სეთურიძე - კურსის მონაწილე: „მოგეხსენებათ, რომ A ლიცენზიის სასწავლო კურსი განახლებული მეთოდით ტარდება. ყველაფერს, რასაც თეორიულად გვიხსნიან, შემდგომში პრაქტიკაში ვიყენებთ. ეს ცოდნა თითოეული ჩვენგანის განათლებისა და განვითარებისთვის ძალიან მნიშვნელოვანია, რადგან მომავალში საშუალება გვექნება, რომ თეორიული ცოდნა მოედანზე ნაყოფიერად გადავიტანოთ.“
ვასილ მაისურაძე - მწვრთნელთა პროფესიული განვითარების განყოფილების ხელმძღვანელი: „A ლიცენზიაზე უკვე მეორე მოდულის სწავლება დავიწყეთ. უნდა აღინიშნოს, რომ მეორე მოდულის მსვლელობისას მსმენელები უფრო მობილიზებული არიან და უფრო მარტივად ასრულებენ დავალებებს. ამ ეტაპზე ისეთ თემებზე ვსაუბრობთ, რომელიც კურსის მონაწილეებისთვის უცხო არაა და პირიქით, ძალიან საინტერესოა. რაც ყველაზე მნიშვნელოვანი და სასიხარულოა, პროგრესი აშკარად იგრძნობა.“
www.gff.ge
