ესპანეთის სახელით მოასპარეზე ქართველ ძიუდოისტ ნიკოლოზ შერაზადიშვილს (90 კგ.) წარმატება ლეგენდარულმა ესპანელმა კალათბურთელმა პაუ გასოლმაც მიულოცა.
შეგახსენებთ, რომ შერაზადიშვილმა აზერბაიჯანის დედაქალაქ ბაქოში მიმდინარე 2018 წლის მსოფლიო ჩემპიონატზე ოქროს მედალი არავის დაუთმო, რითაც ესპანეთის კაცთა ნაკრებს პირველი ჩემპიონობა მოუტანა.
აი, რა დაწერა გასოლმა ტვიტერის გვერდზე: “ნიკოლოზ შერაზადიშვილი ძიუდოში მსოფლიო ჩემპიონია! ის პირველი ესპანელი მამაკაცია, რომელმაც ამ წარმატებას მიაღწია! გილოცავთ!!!”.
თავის მხრივ, დამატებითი წარდგენა არ სჭირდება პაუ გასოლს, რომელსაც კარიერის საუკეთესო წლები ნბა-ში აქვს გატარებული და “ლოს ანჟელეს ლეიკერსთან” ერთად ჩემპიონობა 2-ჯერ უზეიმია, “ოლ სტარში” კი 6-ჯერ უთამაშია.
ესპანეთის ნაკრების მაისურით პაუს მსოფლიო ჩემპიონატი და ევროპის ჩემპიონატი (3-ჯერ) აქვს მოგებული, ოლიმპიადაზე კი 2-ჯერ ვერცხლის, ხოლო ერთხელ ბრინჯაოს მედალი აქვს მოპოვებული.
