ქუთაისის „ტორპედოსა“ და „კუკეშის“ შეხვედრა შესაძლოა არ შედგეს. ამის მიზეზი კი, ალბანური გუნდის ოთხი ფეხბურთელის მიმართ ვიზის გაუცემლობა იქნება.

„კუკეშის“ ვებგვერდი წერილს აქვეყნებს, რომელშიც ნათქვამია, რომ გუნდის ფეხბურთელებს ვიზას არ აძლევენ და თუ სიტუაცია არ შეიცვლება, უეფას მატჩის ჩაშლისკენ მოუწოდებს. აი, რას წერია ალბანური გუნდის ვებგვერდზე:

„საქართველო ჩვენს ფეხბურთელებს ვიზებს არ აძლევს - დიდი შეშფოთებით გატყობინებთ, რომ ევროპა ლიგის მესამე საკვალიფიკაციო ეტაპის პირველი მატჩი, რომელიც 2018 წლის 9 აგვისტოს, 21:00 საათზე თბილისში „ტორპედოს“ წინააღმდეგ უნდა გაიმართოს, ჩაშლის საფრთხის ქვეშაა. ვინაიდან, საქართველოს ხელისუფლება ჩვენს ოთხ ფეხბურთელს, მოზამბიკელ ფატ რეჯინალდოს, მაკედონიელ ვალომ ეტემის და ედის მალიქისა და კოსოვოელ ფატიონ მალოკუს ვიზას არ აძლევს. მას შემდეგ, რაც გაირკვა, რომ „ტორპედოსთან“ მოგვიწევდა თამაში, ჩვენ გავაგზავნეთ ყველა საჭირო დოკუმენტი მასპინძელ გუნდსა და საქართველოს საკონსულოს სტამბულში გავუგზავნეთ. ვაცნობეთ ალბანეთის საგარეო საქმეთა სამინისტროს, უეფას დელეგატებს და დახმარება ვთხოვეთ ვიზასთან დაკავშირებით. კლუბი და საქართველოს ხელისუფლება დაგვპირდა, რომ ეს პრობლემა მოგვარდებოდა, მაგრამ 17:00 საათია და გვეუბნებიან, რომ ვიზის გაცემა ამ ეტაპზე შეუძლეველია.

არსებული ვითარებიდან გამომდინარე ვითხოვთ კლუბისგან და უეფასგან, რომ ეს მატჩი არ შედგეს, რადგან ჩვენთან არ იქნება 4 ფეხბურთელი, რომელთა სახელზე სასტუმროში ფული უკვე გადახდილია. „კუკეშის“ დელეგაცია 21:00 საათზე უკვე თბილისში მიფრინავს, თუმცა 4 მოთამაშის გარეშე. ჩვენ ვეძებთ გამოსავალს, წინააღმდეგ შემთხვევაში მატჩი გადაიდება და პასუხისმგებელი ამაზე ორგანიზატორი გუნდი იქნება. ფეხბურთი ხალხს აერთიანებს, ეს ჟესტი კი არღვევს სამართლიანი თამაშის პრინციპს“, - ნათქვამია განცხადებაში.

შეგახსენებთ, „ტორპედოსა“ და „კუკეშის“ შეხვედრა 9 აგვისტოს, თბილისში, 21:00 საათზეა ჩანიშნული.