საშუალოდ ერთ წუთში, ერთი ქულა! ლებრონ ჯეიმსმა აღმოსავლეთ კონფერენციის ფინალური სერიის მეექვსე შეხვედრაში ფანტასტიკურად ითამაშა: 46 ქუთი, 46 ქულა, 11 მოხსნა, 9 პასი, 3 ჩაჭრა და 1 დაფარება.

თამამად შეიძლება ითქვას, რომ “კლივლენდ კავალიერსს” მიმდინარე სეზონში ლებრონი ექაჩება. ვინ მოთვლის, მერამდენე შემთხვევაა, როდესაც “კავსმა” გამარჯვება “მეფის” ფენომენალური თამაშის შემდეგ რომ მოიპოვა. ახლაც ასე იყო, ჯეიმსის გარეშე “ბოსტონ სელტიკსი” უკვე სუპერფინალის წევრი იქნებოდა.

ვინაიდან, სერიაში “ბოსტონი” 3:2 იგებდა, “კლივლენდს” ყველა გზა მოჭრილი ჰქონდა – უნდა მოეგო. ჰოდა, ლებრონმა საქმეს ხელი რიხიანად მოჰკიდა და თავის გუნდს შანსი შეუნარჩუნა. გარდამტეხი გამოდგა მეორე პერიოდი, რომელიც მასპინძლებმა 16-ქულიანი სხვაობით მოიგეს და უპირატესობა თამაშის ბოლომდე აღარ დაუთმიათ.

“კლივლენდის” რიგებში ლებრონის გარდა, ჯორჯ ჰილი გამოირჩა 20 ქულით, ხოლო ჯეფ გრინის აქტივში 14 ქულა და მოხსნა გახლდათ. “ბოსტონის” შემადგენლობაში ტერი როზიე (28 ქულა, 7 პასი) და ჯეილენ ბრაუნი (27 ქულა, 3 მოხსნა) იყვნენ საუკეთესოები. ჯეისონ ტატუმმა კი მატჩი 15 ქულითა და 3 მოხსნით დაასრულა.

ფინალური სერიის დასკვნითი, გადამწყვეტი და მე-7 შეხვედრა 28 მაისს, ბოსტონში გაიმართება.

“კლივლენდ კავალიერსი” – “ბოსტონ სელტიკსი” 109:99 (20:25, 34:18, 29:30, 26:26) VIDEO