თბილისში ძიუდოს გრან პრი იწყება. პრესტიჟულ საერთაშორისო ტურნირს 30 მარტიდან 1 აპრილის ჩათვლით თბილისის სახელმწიფო უნივერსიტეტის მაღლივ კორპუსთან მდებარე ოლიმპიური სასახლე უმასპინძლებს. კონკურენციაში 38 ქვეყნის 300-ზე მეტი ძიუდოისტი ჩაებმება. ყველაზე დიდი შემადგენლობა ტრადიციულად, ტურნირის მასპინძელ ქვეყანას ეყოლება. ვაჟთა ნაკრების განაცხადი 28 სპორტსმენით დაკომპლექტდა. ქალთა შეჯიბრებაში კი 11 ქართველი მოირგებს კიმონოს.

ნაკრების სამწვრთნელო შტაბის გადაწყვეტილებით, გრან პრიზე გუნდი თითქმის უძლიერესი შემადგენლობით გამოვა. ოპტიმალურ განაცხადს მხოლოდ ოთხი ძიუდოისტი დააკლდება: ევროპის 3-გზის ჩემპიონი და მსოფლიოს და ოლიმპიური თამაშების პრიზიორი ვარლამ ლიპარტელიანი (100 კგ), ევროპის 3-გზის და მსოფლიოს ჩემპიონი ავთანდილ ჭრიკიშვილი (90 კგ), ევროპის პრიზიორი ბექა ღვინიაშვილი (90 კგ) და მსოფლიოს პრიზიორი უშანგი მარგიანი (90 კგ).

ქართველი მწვრთნელებისგან განსხვავებით, უცხოელებმა თბილისში უძლიერესი შემადგენლობების ჩამოყვანისგან თავი შეიკავეს. იაპონიისა და სამხრეთ კორეის ნაკრებებს კი თითო სპორტსმენიც არ წარმოადგენს.

ქართული გრან პრი მსოფლიოს ვაჟთა რეიტინგის მოწინავე ხუთეულის უცხოელ წევრთაგან მხოლოდ რუსეთის ნაკრების წევრმა ალან ხუბეცოვმა (მე-4 ნომერი 81 კილოგრამში) დააფასა. შვიდი წონითი კატეგორიიდან ოთხში ქართველი ძიუდოისტები პირველ ნომრებად არიან განთესილები და თუ სასწაული არ მოხდა, მედლების დიდი ნაწილიც საქართველოში უნდა დარჩეს.

სამდღიანი ტურნირის პირველ დღეს – 29 მარტს საპრიზო სამეულები ვაჟებში 60 და 66 კილოგრამ წონით კატეგორიებში შეივსება, ქალებში – 48, 52 და 57 კილოგრამებში. წინასწარი ეტაპის შეხვედრები დილის 11 საათზე დაიწყება. 15:30 საათზე გრან პრის გახსნის ცერემონიალი შედგება. 16:00 საათიდან კი ფინალური ბლოკის ორთაბრძოლები.

საქართველოს ნაკრების წევრთაგან, პირველ დღეს მედლებისთვის ბრძოლაში ჩაებმებიან: ამირან პაპინაშვილი, ლუხუმ ჩხვიმიანი, ლაშა ჩადუნელი, თემურ ნოზაძე (ოთხივე 60 კგ), ვაჟა მარგველაშვილი, ლაშა გიუნაშვილი, ნიკო ჭიკაიძე, ზვიად ხუბულური (ოთხივე 66 კგ), ნატალია ყიფშიძე, ლია როგავა, მარი მახარაშვილი (სამივე 48 კგ), მარიამ ჯანაშვილი (52 კგ) და ეთერ ლიპარტელიანი (57 კგ).

საქართველოს ძიუდოს ფედერაციის გადაწყვეტილებით, თბილისის გრან პრიზე დასწრება თავისუფალია.

საქართველოს ნაკრები

ვაჟები

60კგ - ამირან პაპინაშვილი, ლუხუმ ჩხვიმიანი, ლაშა ჩადუნელი, თემურ ნოზაძე.

66კგ - ვაჟა მარგველაშვილი, ლაშა გიუნაშვილი, ნიკო ჭიკაიძე, ზვიად ხუბულური.

73კგ - ლაშა შავდათუაშვილი, ომარი ნიაზაშვილი, ზვიად კაპანაძე, ფრიდონ გიგანი.

81კგ - ზებედა რეხვიაშვილი, თამაზ კირაკოზაშვილი, ნუგზარ ტატალაშვილი, კობა მჭედლიშვილი.

90კგ – ნოდარ ბერიანი, გიორგი გველესიანი, გიორგი პაპუნაშვილი, თორნიკე ჯუღელი.

100კგ - ლაშა ტაველური, ონისე სანებლიძე, იასონ ნემსაძე, დავით ოზბეთელაშვილი.

+100კგ - გურამ თუშიშვილი, ადამ ოქრუაშვილი, ლევან მატიაშვილი, ონისე ბუღაძე.

ქალები

48კგ - ნატალია ყიფშიძე, ლია როგავა, მარი მახარაშვილი.

52კგ - მარიამ ჯანაშვილი.

57კგ - ეთერ ლიპარტელიანი.

63კგ - მზია ბებოშვილი.

70კგ - მარიამ ჭანტურია, ელისო სისაური.

78კგ - ნინო ოძელაშვილი.

+78კგ - ელენე ქებაძე, სოფიო სომხიშვილი.