საქართველოს ძიუდოისტთა ნაკრებისთვის ბუდაპეშტში მიმდინარე მსოფლიოს ჩემპიონატის პირველი დღე წარუმატებელი აღმოჩნდა. დღეს, მსოფლიოს ჩემპიონები მამაკაცთა და ქალთა თითო უმსუბუქეს წონით კატეგორიაში უნდა გამოვლინდნენ. ქართული განაცხადის 12 წევრიდან კი საქმეში პირველი ამირან პაპინაშვილი (60 კგ) ჩაერთო და საპრიზო სამეულისთვის ბრძოლის გაგრძელების შანსი ადრიანადვე დაკარგა.
მსოფლიოს ჩემპიონატზე პირველ ნომრად განთესილმა პაპინაშვილმა მეორე წრიდან დაიწყო - მონაკოელ ნეილ სიკარდისთან შეხვედრით. მეტოქე ორჯერ დაიჭირა შებოჭვაზე, მაგრამ ორივეჯერ ვაზარიმდე ავიდა და სწორედ ამ ორი ვაზარით იმარჯვა.
მერვედფინალში კი უზბეკ დიორბეკ უროზბოევს დაეჭიდა, რომელთანაც რიო დე ჟანეიროს 2016 წლის ოლიმპიურ თამაშებზე რეპეშაჟის ფინალში დამარცხდა. რევანში არ შედგა – ამირან პაპინაშვილმა ამჯერად ხელის მტკივნეულით წააგო და მსოფლიოს ჩემპიონატზე გამოსვლა დაასრულა.
