თბილისის სპორტის ახალ სასახლეში დღეს დაწყებულ მსოფლიოს ჩემპიონატზე ბერძნულ-რომაული სტილით მოჭიდავე ჭაბუკებს შორის, დილის პროგრამაში შეტანილი შეხვედრები დასრულდა და ფინალურ ბლოკში ჭიდაობის უფლება საქართველოს ნაკრების ხუთი წევრიდან ორმა მოიპოვა - გიორგი შოთაძე (50 კგ) და ლერი აბულაძე (54 კგ) ფინალში გავიდნენ.

შოთაძემ შეჯიბრება რუმინელი კონსტანტინ-ბენონე ლუპუს იოლად ძლევით გახსნა (9:0). შემდეგ ირანელი პოია სულატ დად მარცი (4:2) და აზერბაიჯანელი ზაურ ნურიევი (3:0) ჩამოიშორა. საჩემპიონო ბრძოლაში კი რუსეთის ნაკრების წევრ ანზორ კარაგულოვს შეხვდება.

ლერი აბულაძემ ფინალის გზაზე ოთხ მეტოქეს: იტალიელ რიკარდო გლავეს, ყირგიზ ჟოლამან შარშენბეკოვს, უზბეკ დილშოდ ომონგელდიევსა და აზერბაიჯანელ ელნურ მუსაიევს აჯობა. ოთხივეს ერთნაირი ანგარიშით – 8:0. ოქროს მედლისთვის კი თურქ ქერემ ქამალს დაუპირისპირდება.

დღესვე, მსოფლიო კონკურენციაში ირაკლი ძიმისტარიშვილი (58 კგ), ქერიმ მაჩალიკაშვილი (63 კგ), საბა ცეცხლაძეც (100 კგ) ჩაერთნენ, მაგრამ საპრიზო სამეულები მათ გარეშე შეივსება.

ძიმისტარიშვილი შეჯიბრებას მერვედფინალიდან გამოეთიშა, აზერბაიჯანელ ჰასან მამადლისთან მარცხით (1:5). მაჩალიკაშვილი (63 კგ) ძირითად ბადეში მეოთხედფინალამდე მივიდა. იქ კი იაპონელ რიომა ანრაკუსთან დამარცხდა (2:8). მეოთხედფინალიდან გამოეთიშა ჩემპიონატს ცეცხლაძეც, ინდოელ დეეპანშუ დეეპანშუსთან წაგებით (0:1).

19:00 საათზე მსოფლიოს ჩემპიონატის გახსნის ოფიციალური ცერემონიალი დაიწყება. შემდეგ კი ფინალური ბლოკის შეხვედრები შედგება.