“მანჩესტერ იუნაიტედის” ჰოლანდიელმა დამრიგებელმა ლუი ვან გაალმა პრემიერლიგის 35-ე ტურში “ვესტ ჰემთან” (2:3) განცდილი მარცხის შემდეგ მცირე კომენტარი გააკეთა და აღნიშნა, რომ გუნდს კიდევ აქვს მეოთხე ადგილის დაკავების შანსი.

“ძალიან იმედგაცრუებულები ვართ. სტანდარტების გამო წავაგეთ. როცა 70-ე წუთამდე 2:1-ს იგებ, ბურთზე მეტი კონტროლი უნდა დაამყარო, უნდა გამოიყენო მოედნის სივრცე. მიუხედავად ამ მარცხისა, შეგვიძლია მეოთხე ადგილი დავიკავოთ და მომდევნო სეზონში ჩემპიონთა ლიგაზე ვითამაშოთ, მაგრამ ეს ყველაფერი მხოლოდ ჩვენზე აღარაა დამოკიდებული” – ვან გაალის სიტყვებს BBC-ი ციტირებს.

“მანჩესტერი” 63 ქულით მეხუთე ადგილზე იმყოფება და თანაქალაქელ “სიტის” ორი ქულით ჩამორჩება. ბოლო ტურში “მანჩესტერი” შინ “ბორმუთს” ხვდება, ხოლო “სიტი” გასვლაზე “სუონსის” დაუპირისპირდება.