თუკი “ნიუკასლი” მიმდინარე სეზონში პრემიერლიგაში ადგილს შეინარჩუნებს, გუნდის ახალი მთავარი მწვრთნელი რაფაელ ბენიტესი ხელფასთან ერთად სოლიდურ ბონუსს მიიღებს. როგორც The Times-ი იტყობინება, მხარეები შეთანხმდნენ, რომ აღნიშნული მიზნის განხორციელების სანაცვლოდ, ესპანელი სპეციალისტი საკუთარ ბიუჯეტს 3 მილიონ გირვანქა სტერლინგს შემატებს.
ბენიტესმა ინგლისურ კლუბთან სამწლიანი კონტრაქტი 11 მარტს გააფორმა. ხელშეკრულებაში გათვალისწინებულია, რომ მწვრთნელს შეუძლია კლუბი სეზონის ბოლოს დატოვოს, თუ “კაჭკაჭები” პრემიერლიგიდან დაქვეითდებიან.
ინგლისის ჩემპიონატის მიმდინარე სეზონის დასრულებამდე 10 ტურით ადრე “ნიუკასლი” 24 ქულით სატურნირო ცხრილში ბოლოსწინა, მე-19 ადგილზე იმყოფება.
